SHILLONG: Assam Legislative Assembly election-o Conrad K Sangma-chi dilenggipa National People’s Party (NPP), constituency damgnio susaahaoba, constituency damgnion chu·sokgipa ong·na man·jaha.
Assam Assembly election-ko re·anggipa April jani 9 tariko ong·ate, election-ni result-rangko Sombar salo parakatahachim. Ia election-o NPP, Assam-ona account kulina miksonge susapaahachim indiba constituency damgnion chu·sokgipa ong·na man·jaha.
A·bachengode NPP, constituency damgittamo candidate-rangko susaatahachim aro ia candidate-rangara, Haflong constituency-na Daniel Langthasa, Boko-Chaygaon constituency-na Ganseng B Sangma aro Mankachar constituency-na Md Aminul Islam ong·achim. Indake ong·genchimoba, election ong·na skangmangmang Mankachar constituency-ni candidate Md Aminul Islam, NPP-oni ong·kate Congress dolo napangskaaha.
Haflong constituency-o NPP-ni candidate Daniel Langthasa, BJP candidate-ni jako amako man·aha aro Boko-Chaygaon constituency-o Ganseng B Sangma, gittamgipa biapkosa man·rikskaaiaha.
Batanggimin 2021 bilsini Assam Assembly election-oba NPP, dam 11 constituency-rango candidate-rangko susaatahachim indiba seat damsakoba cherikna man·jahachim.
Ia chang Assam Assembly election-oba NPP, constituency damgnio susataiahachim indiba ia changoba seat damsakoba chena man·taijaha.
