CPF scheme-ni bidingo dilsretna jotton ka·a ine skigiparang matnanga
SHILLONG: Meghalaya Non-Government Schools and Colleges Employees Centralised Provident Fund Scheme, 2026-ko a·dokni deficit skul aro college-rango kam ka·giparang jegaltokengani gimin Budbar salo, Education department-ni official-rang baksa tom·e chanchirimani chu·sokgipa ong·na man·jaha.
Education department-ni tom·aniko ong·atanio official-rang, CPF 2026 scheme-ni gimin dilsretna jotton ka·aha ine Khasi Jaintia Deficit School Teachers’ Association (KJDSTA) aro Meghalaya College Teachers’ Association (MCTA) matnangtokaha.
Ia chanchirimaniko chu·sokgipa ong·ja ine aganahani gimin tom·aniko dilenggipa Education department-ni Commissioner & Secretary Vijay Kumar Mantri, tom·aniko dontongate, uamangko re·angna man·aigen ine aganani ja·man KJDSTA aro MCTA-ni dilgiparang, Secretariat-o donggipa Main Conference Room-oni ong·kate kataha.
Tom·aoni re·ongkatbaani ja·man kobor ra·timgipa manderang baksa agangrikengon, ia tom·aniona sorkari, KJDSTA aro MCTA-kosan okamaiaha indiba Garo Hills Deficit School Teachers and Employees Association (GHDSTEA) aro Meghalaya College Non-Teaching Employees Association (MCNTEA)-kode okamjahani gimin ian kraa ong·jaha ine KJDSTA-ni president Boswell Pala parakataha.
“Chingni neng·nikani aro nanganirangko knatime ra·na gita deficit skul aro college-rango kam ka·giparang baksa tom·aniko ong·atenga ine sorkarini u·iataniko man·soe chinga kusi ong·ahachim indiba ia tom·anio chinga dolgnikosan okamataiahani gimin chinga suk ong·jaha. Deficit skul aro college-rango kam ka·giparangni neng·nikanirangko aro nanganirangko ma·sie ra·na sikmanchaenga ong·ode sorkari, pilak dolrangkon agangrikaniona okamna nanggen,” ine Pala aganaha.
Ia tom·anio, bank official-rang aro Board of Trustees-ni membor-rangba dongpaahani gimin suk ong·gijaniko parakatskaengon, ia tom·anikora deficit skul aro college-rango kam ka·giparangni neng·nikanirangko sorkarina aganna gitasa ong·atahachim indiba ia tom·anio bank official-rang aro gipin official-rangko dongpaataniara kraani ong·ja ine Pala parakataha.
Board of Trustees-ko niam gri songpiltaia ineba KJDSTA-ni president, an·tangni suk ong·gijaniko parakataha.
Pala-ni u·iatani gitade, bilsi gittamna 2023 bilsio songgipa Board-ni term-an matchotkujaengachim aro ia bilsini bon·angachibarasa matchotani ong·engachim indiba ia term bon·na skangan gital Board-ko songpiltaiahachim.
Ia tom·anio bak ra·ena skang, Shillong Press Club-oba KJDSTA-ni president, kobor ra·timgiparangna talataniko on·angengon, uamangni jegalenggipa Meghalaya Non-Government Schools and Colleges Employees Centralised Provident Fund Scheme, 2026-ni bidingosa sorkari chanchirimna miksongenga ine an·tangni suk ong·gijaniko parakataha.
Ia scheme-ko jegalengani gimin talataniko on·angengon, ia scheme-ko National Pension System (NPS)-ni palsa ra·baani gita ong·enga maina CPF-ni kamrangko 2023 aro 2024 bilsirango Office Memorandum (OM)-rangko on·anichi a·bachengatmanahachim ine Pala aganaha.
Dongimin niamrango pangchake 2023 bilsion dingtang scheme-ko tarie kamrangko a·bachengpilahachim ine janapatengon, ia scheme-ni kamrangko tong·sao dontongate, gital scheme-ko ra·gataniara namen kragijani ong·a ine KJDSTA-ni president parakataha.
