SHILLONG: Tura jillako nitobatate taridapna ra·gatgimin dingtang dingtang project-rangko nipilna gita Mongolbar salo, a·dokni Chief Minister Conrad K Sangma-ni dilanichi tom·aniko ong·atangaha aro ia tom·anio, a·dokni Cabinet Minister Timothy D Shira, Cabinet Minister Sanbor Shullai aro dingtang dingtang official-rangba dongpae bak ra·angaha.
Ia tom·anio, Tura jillani dingtang dingtang biaprangko nitobate taridapna ra·gatgipa gong kror 1331-ni project-rangko nipilangaha aro ia project-rangoni mitamranga, gong kror 165-ni Tura Integrated Administrative Complex, PA Sangma Sports Complex, Pa Togan Sangma Track & Field Stadium aro Tura Technology Park ong·a.
Jako ra·e ka·enggipa gipin project-rangara, Tura Bazar-ko nitodapatani, Convention Centre, Pelga Tourist Circuit & Hospitality Complex, Working Women’s Hostel, heliport aro Tura Water Supply Scheme ong·a.
Ia tom·anio, tender on·na tarimangimin kror 242.74-ni project-rangkoba nipilangaha. Ia project-rangoni mitamrangara, Najing Bazar-ko taridapani, SMELC-o gari donchakani biap aro cinema complex-ko rikani, Tura City Park, Active Ageing Centre, Araimile-o Kids Zone aro Tura Promenade ong·enga.
Sorkarini manchisogimin gipin kamrangara, Chief Minister’s Youth Center, Circuit House-ko taridapani, commercial complex-ko rikani, street light-rangko chatani, aro Kendriya Vidyalaya-o kal·chakram biaprangko taridapanian ong·enga.
Tura songjinmako nambate taridapna gimik gong kror 1928-mangni gita tangka paisarangko hisapsoaha ine janapatengon, ia kamrangko somoi gita matchotatchina aro dingtang dingtang department-rangni gisepo nangrime kamko ka·china Chief Minister didiataha.
