TURA: Border Security Force (BSF)-ni me·chikrangna an·seng baljokaniko on·na miksonganio, North Eastern Hill University (NEHU) Tura Campus-ni Horticulture Department, BSF Dobasipara Sector Headquarter baksa nangrime, ‘ICAR-IIHR Technologies for Production of Vitamins and Minerals rich Vegetables’-ni bidingo Capacity Building program-ko Dobasipara-o donggipa BSF headquarter-o ong·atangaha.
Ia program-ko ong·atanio, BSF Dobasipara SHQ-ni DIG Lalit Sharma, mongsonggipa sokgipa ong·e bak ra·angaha aro unbaksana Central Agricultural University (Imphal)-ni ning·o donggipa Tura College of Community Science-ni Dean Prof Jyoti V Vastrad, BSF Women Welfare Association-ni president Puneet Sharma aro dingtang dingtang official-rangba dongpae bak ra·angaha.
Ia program-ko ong·atanio BSF-ni DIG Lalit Sharma, jinmana aganprakengon, me·chikrangni namgnina ia program-ko ong·atahani gimin NEHU Tura Campus-ni Horticulture Department-ko mittelpilangenba, an·seng baljokaniko man·na gita noktangtangon me·su baganrangko dakchina aro namgipa me·su samjakrangko cha·china agan-ku·pattianirangko on·angaha.
Ia tom·anio Tura CCS-ni Dean Prof Jyoti V Vastrad-ba jinmana aganprakengon, bilakgipa aro an·seng baljokgipa nokdangko ong·atna pangnan ong·telaigipa a·salrangchi game ge·e man·gipa me·su samjakrangko cha·na nangani gimin aganangaha.
Ia program-ko ong·atanio sak 150 me·chikrangna ICAR-IIHR Bengaluru-ni dakchake on·atgipa Arka Vegetable Seed kits-rangko suale on·angjolaha.
