SHILLONG: Election Commission of India (ECI)-ni gita da·o gittamgipa changna a·song gimikon Special Intensive Revision (SIR)-ko dakna siengon, Meghalaya a·dokoba electoral roll-rangko nipilna gita re·baenggipa June 20 tarikoni a·bachengatgen ine Bristibar salo parakataha.
ECI-ni u·iatani gitade, Meghalaya a·doko SIR-na tarisamsoani aro training-rangko June 20 tarikoni June 29 tarikona on·anggen aro uni ja·man Booth Level Officer (BLO)-rang, June 30 tarikoni July 29 tarikona, nokantichi re·e bimingrangko nipilanggen.
Meghalaya a·dokara, Bangladesh a·song baksa nangchapgipa a·dok ong·ani gimin niam gri napsrukbagipa manderangna kenchakna nanggipa biap ong·a aro iani giminan a·dokni electoral roll-rango niam gri biming segatgiparangko den·galna gita SIR-ko dakchina dingtang dingtang dolrang dabitokengachim.
Meghalaya a·dokna draft electoral roll-rangko ia 2026 bilsini August 5 tariko chapa ka·gen ine u·iatengon, September jani 4 tarikona kingking a·kangani aro jegalna nanganirangko dakna man·gen aro bon·kamgipa electoral roll-ko ia 2026 bilsini October 7 tariko chapa ka·gen ine ECI parakataha.
SIR-ni gittamgipa bako, Meghalaya aro gipin a·dokrangna October 1 tarikko qualifying date dake donenba ka·anggen ineba ECI u·iataha.
ECI-ni u·iatani gitade, da·o dipet Meghalaya a·doko gimik sak 23,43,252 pu·ongiparang donga aro electoral roll-rangko nipilna gita a·dok gimiko sak 3551 BLO-rangko donatgen.
Electoral roll-rangko namdapatna gita SIR-ko dakanio maming jat baseani grisa, electoral roll-rangko nipilanggen ineba Election Commission-oni talataniko on·ataha.
Meghalaya a·doko, mongsongbate Garo Hills-ni a·kawe jolrango, gipin biaprangoni napsrukbae songdong a·chagiparang bang·en donga ine matnangenba, niam gri electoral roll-rango segatgipa bimingrangko den·galna aro niam gri songdongenggipa manderangko a·rikgalna Special Intensive Revision-ko dakchina dabitokengachim.
