TURA: Umiam-o donggipa ICAR-ATARI Zone-VII aro Central Agricultural University (Imphal)-ni dakchake on·anichi South Garo Hills a·jani Krishi Vigyan Kendra (KVK), ong·telaigiparang a·salrangchi gama ge·anirangko dakani bidingo skie on·na gita dingtang dingtang songrango awareness program-ko ong·atangaha.
A·salrangko porikka ra·e nina nangani aro gama ge·anio, kraa gita samrangko jakkalna nangani bidingo game ge·e cha·giparangna ma·siate on·na ia program-ko ong·atenga aro ia awareness program-ko re·baenggipa May 20 tarikona kingking, dingtang dingtang songrangoba ong·atangkugen ine KVK-ni official-rang u·iataha.
Ia awareness program-ko ong·atanio, kraa gita samrangko jakkalna nangani giminba game ge·e cha·giparangna skie on·enga.
Da·o dipet ia awareness program-rangko ong·atanio, South Garo Hills a·jani dam 28 songrangoni sak 784 game ge·e cha·giparang bak ra·aha ine SGH-KVK-ni official-rang parakataha.
