TURA: South West Garo Hills a·jani Garobadha Police Investigation Centre (PIC)-ko police outpost dakskana parakatani ja·man, iana A·chik State People’s Front (ASPF) Garobadha unit, suk ong·gijaniko parakatenba, ia Garobadha PIC-ko police station-ona ra·doatchina dabiangskaaha.
Iani bidingo Meghalaya a·dokni Director General of Police (DGP)-na sedoatengon, Garobadha jolrangara namen dal·begipa aro mande jelbra jelsugipa biap ong·ani gimin police station-kosa nangengachim indiba Garobadha PIC-ko police outpost-ona ra·ongalaniara, Garobadha jolrangna simsak-nirokaniko on·na gisik nanggijaniko mesokani gitasa ong·aha ine ASPF Garobadha unit parakataha.
“Garobadha-o PIC-ko donaniara, ong·gija kamrangko champengna chel·chakaniko on·ani gita ong·engachim indiba da·o ia PIC-ko police outpost-ona ra·onataniara, Garobadha jolrango chel·chakaniko bilgriatani gitasa ong·skaengaha. Garobadha PIC-ko police outpost dakskana tik ka·aniara ong·gija ramako re·na baseani gitasa ong·enga,” ine ASPF Garobadha unit-ni dilgiparang, DGP-na sedoatgipa chittio janapataha.
Garobadha jolrango dingtang dingtang dake ra·bianirangko chagrongna nangronga ine janapatskaengon, Garobadha PIC-ko outpost-ona ra·onataniara, ia neng·nikanirangko bariatna cholko oe on·ani gitasa ong·engaha aro ian chel·chakaniko bariatani pal, olgrokatani gitasa ong·enga ine ASPF parakataha.
Indake ong·engon, Garobadha PIC-ko outpost-ona ra·onatna miksonganiko ra·pilenba, apsan daken PIC-ko donpilchina aro Garobadha PIC-ko chu·gimik police station-ona ra·doatskana gita ja·kurangko de·china gitaba ASPF Garobadha unit, a·dokni DGP-ko didiataha.
South West Garo Hills a·jao police-rangni kamrangko nambate ka·na aro manderangna nambate nirok sandianiko on·na man·na gita Garobadha Police Investigation Centre (PIC)-ko Police Outpost-ona ra·doataha ine adita salrangna skangsan sorkari official-rang u·iatahachim.
Garobadha Police Outpost-ko Damalgre Police Station-ni ning·o chalaigen ineba official-rang parakatahachim.
