SHILLONG: Meghalaya-ni voter-rangko 68 percent-na baten 2005 bilsini electoral roll-ni gita nimanaha, Election Department June 20-oni a·dok gimiko Special Intensive Revision (SIR)-ko tarina a·bachenggnok.
A·dokni 23.44 lak voter-rangoni lak 16.14 elector-rangko 2005 electoral roll-o serikanirang gita nimanaha ine Chief Electoral Officer B.D.R. Tiwari aganaha.
Meghalaya, nipiltaianiko bak man·angpagipa ong·e dongimin 2026 October 1-o India-ni SIR programme-ni Election Commission-ni gittamgipa bako man·chapaha.
Official-rangko training ra·aniko aro biming segatani form-rangko chappa ka·aniko June 20-oni June 29-ona ka·anggen, Booth Level Officers (BLO)-rang, June 30-oni July 29-ona nokantiona wenrorogen. Dongimin somaio polling station-rangni kamrangko matchotatgen.
Draft electoral roll-ko August 5-o parakatgen uni ja·mano September 4 tarikona kingking a·kangna aro jegalna lekkarango gaptna man·gen. A·kangani aro jegalani kamko October 7-o bon·kamgipa electoral roll-rangko parakatna skang October 3-ona king king man·gen. Nipiltaiani kamko ka·mtitingo lekkarangko on·a dingtang dingtang gadangrangni ning·o electoral-rang ga·akgen, CEO aganaha.
Voter-rang jemangni bimingrang 2005-ni electoral roll-o dongmanaha biming segatani lekka baksa voter list-ni kragipa lekkako on·asan nangaigen.
July 1, 1987-na skang atchigiparang 2005 roll-o biming dongjawa uamang EC-ni ra·chakgipa list-oni an·tangan attest ka·gipa lekkako on·a nanggen.
July 1, 1987 aro December 2, 2004-ni gisepo atchigiparang jemangni ma·gipa-pagiparangni bimingrang 2005 voter list-o dongja ma·gipa ba pagipani ong·chong lekkarang baksa uamang an·tangtangni lekkako mesokna nanggen.
Atchiani certificate-rangko nangchongmota ong·ja, SC, ST ba OBC certificate-rangko, passport-rangko, ration card aro EC-ni ra·chakgimin gipin lekkarangko on·a nanggen, Tiwari talataha.
