TURA: Noktangtango do·orangko jile cha·ani bidingo agan-talatanirangko on·na gita adita salrangna skang, West Garo Hills ICAR-KVK-ni gita training program-ko Rimrangpara songo ong·atangaha.
Ia training program-ko ong·atanio Rimrangpara jolrango donggipa dingtang dingtang songrangoni sak 40-mangni gita do·o jile cha·gipa manderang bak ra·angtokaha aro ia program-ko ong·atanio, West Garo Hills KVK-ni ACTO (Animal Science) Dr Sagarika Borah, songni manderangna aro do·o jile cha·giparangna agan-talate on·angengon, do·orangko jilanichi me·chikrangnaba janggi tangani cholrangko on·na man·a ine aganangaha.
Kuroiler, Vanaraja, Kamrupa, Srinidhi, aro Grampriya gita dakgipa do·orangko jilanichi ta·rakbate aro bang·bate bitchirangko man·na ama ineba Borah parakangaha.
Rimrangpara jolrango do·o jile cha·enggipa manderang nambate do·orangko jilna man·na gita ia training program-ko ong·atanio do·o jilani bosturangkoba KVK-ni gita suale on·angjolaha.
