TURA: Garo Hills Deficit School Teachers’ and Employees’ Association (GHDSTEA), Deficit schools aro colleges-ni CPF pension scheme-ni bidingo golmal ong·enganiko ta·rake nirokatchina dabie Chief Minister Conrad Sangma-ko gronge memorandum-ko ong·aha.
May 22 tarik Sukrobar salo on·gipa memo-o deficit teacher-rang, sorkarini ra·gatna miksongenggipa Meghalaya Non Government Schools and Colleges Centralized Provident Fund Scheme, 2023-ko ra·chakna tik namnikaniko janapaha. Indiba batanggimin bilsi 2024-o sorkarini on·gipa ge·etanio jeon sorkari, Meghalaya Non Government Schools and Colleges Centralized Provident Fund Scheme, 2026-ko ra·gatna aganskahachim, iana namnikskajaha.
“Chinga, 2023-ni scheme-ko ra·gatakosa nangnika, uno bilsi 2010-na skang kamo napgiparangna CRF-o pangchake aro bilsi 2010-ni ja·man kamo napgiparangna National Pension Scheme (NPS)-o pangchake pension-ko on·na agana” ine association janapaha.
A·dokona Deficit System-ko batanggimin bilsi 1980-ni somoio darang gipin ong·ja Garo Hills a·jani niksenggipa dilgipa P. A Sangma sagian ra·baahachim ine gisik ra·ate association, Chief Minister Conrad Sangma-ko ia mamlako nirokatchina mol·molaha. Aro a·doko 2023-ni scheme-ko ra·gatchina mol·molangaha.
