SHILLONG: Adita salrangni gisepo ong·atna sienggipa Shillong Lok Sabha by-election-na United Democratic Party (UDP), saksa senior lawyer ba ukil VGK Kynta-ko candidate-na parakataha.
Bristibar salo, UDP-ni tom·aniko ong·atangani ja·man, Kynta-ko party-ni candidate-na seokaha ine UDP-ni president Metbah Lyngdoh parakataha.
Ia tom·anio Kynta-ko UDP-ni saksa member dakeba rimnapjolangaha.
Shillong Lok Sabha by-election-na candidate-ko man·kujaengani gimin ia election-o susagenma susajawa name ma·sikujaenga ine adita salrangna skangsan UDP-ni dilgiparang parakatahachim. Indake ong·genchimoba, Budbar salo UDP-ni dilgiparang, saksa ja·delgipa ukil VGK Kynta-ko sing·sandienba, Bristibar salo uko Shillong Lok Sabha by-election-na party-ni candidate dake parakataha.
Shillong Lok Sabha by-election-o susana gita da·o UDP-ba candidate-ko parakatahani gimin ia election-o susana sienggipa candidate-rang sakbri gapengaha.
Shillong Parliamentary by-election-o susana gita Congress dolde gitcham MP Vincent Pala-ko, NPP-ba Khasi Authors Society (KAS)-ni president Dr DRL Nonglait-ko aro VPP-ba party-ni dilgipa Batskhem Myrboh-ko susaatna tik ka·manahachim.
BJP-ba ia by-election-o susana miksongenga indiba da·o dipet candidate-ko parakskakujaenga.
Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
