RESUBELPARA: North Garo Hills aro East Garo Hills a·jako nangdimeatgipa ramarangoni mongsongbatgipa aro seng·sotbatgipa Mendipathar-Songsak ramani obosta namsrangjaengahani a·sel, ramako re·ruraenggipa manderang neng·nikanirangko chagrongna nangtokenga ine A·chik State People’s Front (ASPF) parakatenba, ia ramako ta·raken taripile on·china a·dokni Chief Minister Conrad K Sangma-na sedoataha.
Chief Minister-na sedoatgipa chittio ASPF-ni parakatani gitade, ia ramara, North Garo Hills aro East Garo Hills-ni gisepo mongsongbatgipa re·a doani chol gita ong·engachim indiba ia ramako ru·uta bilsirangna tarigija galchipe donahani a·sel da·o ramako re·ruraenggipa manderang aro jolo songdongenggipa manderang, neng·nikanirangko chagrongna nangtokenga.
“Mendipathar-oni Songsak-ona dakanggipa rama jol gimikon a·kolrara dakako aro a·dubekrara dake rama rimilako nikna man·enga. Ia sal somoirango mikkarangba waengahani gimin rama jol gimikon chirangni ditdoe dongako nikna man·enga. Ia rama jol gimikan namsrangjahani a·sel Mendipathar-oni Songsak-ona kontasa nangaigipa ramako re·na konta gittam batpile nangengaha aro ian sagipa manderangko salruraanio, chatro chatrirangni skulrangchi re·ruraanio aro dingtang dingtang kamrangna re·ruraenggipa manderangna neng·nikanirangko ra·baani gita ong·enga,” ine ASPF-ni chief organising secretary Raksim R Marak parakataha.
Ia ramako tarina gita ta·raken ja·kurangko de·chakatchina aro ramako tarina gita sanction ka·manaha ong·ode kamrangko ta·raken a·bachengatchina Chief Minister-ko didiatengon, ia ramako ta·rake tarie on·anichi ian jolo songdongenggipa manderangnasan ong·aigija dingtang dingtang nangchongmota kamrangna ia rama gita re·ruraenggipa pilak manderangnan namgniko ra·baani ong·gen ine ASPF parakataha.
