SHILLONG: Election changantian pu·ongiparangni bewalde dingtangna man·aiani gimin 2024 bilsini Shillong Lok Sabha election-o Voice of the People’s Party (VPP)-ni chegipa ong·aniara, pangkamgipa ong·aniko mesokahama ma ian dikdiksana cheanikosan mesokaiahama, da·o ong·atna sienggipa Shillong Lok Sabha by-election-o nikna man·gnok ine Robibar salo, National People’s Party (NPP)-ni dilgipa Ampareen Lyngdoh parakataha.
Election changantian pu·ongiparangni dakbewalrangde dingtangaia ine janapatengon, VPP-na chakgiparangni bilko da·o ong·atna sienggipa Shillong Lok Sabha by-election-an talbate mesokgnok ine Lyngdoh parakataha.
“Election changsaoni changgipinona manderangni chanchianirangba dingtangaia ine anga an·tangde nikna man·aha, uni gimin ia by-election ong·kuchina, unode an·ching VPP-na manderangni chakani dongkugenma ma ua changsanasanma uko ma·sina man·gnok. An·ching ia by-election-ko senge nikuna,” ine ua aganaha.
Lyngdoh-ni parakatani gitade, gisepgriko political party-rangna balwarang name balgenchimoba, Meghalaya a·dokode a·songni gipin biaprang baksa apsan ong·ja aro politics-o dingtanggrikaniko nikna man·rongaia.
“Badiaba political party-na a·song gimikon balwarang name balengnaba gnang aro BJP-ni mingsinganiko an·ching India a·song giimikon nikna man·aha. Indiba iandakgipa balwarangara, Meghalaya a·dokni simarangon bon·chongdikaia maina a·dokni manderangde candidate-rangko aro an·tangtangni nanganirangko nianio dingtang chol donga,” ine NPP-ni dilgipa aganaha.
Lyngdoh-ni aganani gitade, Parliament-ni member-rangko seokengon, national party-rangni dilgiparangko seokgenchimosa nambate kamrangko ka·na man·a ine skangode bang·bata manderangan chanchitoka aro iani a·selan Parliamentary election-rango chonchongipa ba joltangni party-rangde neng·nikanirangko man·ronga.
West Bengal a·dok baksa tosusae janapatengon, ru·uta bilsirangna BJP-chi dilenggipa ma·mong sorkari baksa meligrikna man·jani a·selsa West Bengal a·doko sorkariko chalaianioba nangchakeanirangko man·aha aro mongsonggipa kamrangko chu·sokatanio neng·nikanirangko chagrongna nangaha ine Lyngdoh parakataha.
“Iandakgipa kamrangko manderang maikai nisusaa an·ching mikkangchi nikna man·aigen. Voter-rangde pangnan an·tangtangni nikmangimin aro ka·dongsoanirango pangchakesa dilgipako seokaia,” ine ua aganaha.
Pu·ongiparang, bilo ong·enggipa ma·mongni party-rangna chakpaaniko on·na nangama ine sing·anina aganchakaniko on·angengon, iade pu·ongiparangni skaniosa pangchakaia ine Lyngdoh, iani giminde mamingkoba aganna gita jechakskaaha.
