AMPATI: Sombar salo, West Garo Hills a·jani Cooperative Societies Office, India sorkarini ning·o donggipa Cooperation Ministry-ni changbongagipa Foundation Day-ko maniani bak gita Cooperative Week-ko Ampati-ni BADO MFC Hall-o manidilangaha.
Ia program-ko ong·atanio, South West Garo Hills a·jani Deputy Commissioner Anendya Raajshree, mongsonggipa sokgipa ong·e jinmana aganprakangengon, pilakni gitan dal·roroani, an·tangtango pangchakna man·ani aro songadam nokadamrango pangkamgipa janggi tangani cholrangko on·anio cooperative-rangni mongsonggipa daitorangko agan-talate on·angaha. South West Garo Hills a·jani namroro silroroanina pilak cooperative society-rangkon bakrime kam ka·china gitaba Deputy Commissioner didiangaha.
Program-ko a·bachengatanio, ia tom·anio sokbagiparangna mande ra·pilskaaniko dakangaha aro uni ja·man rimchaksoani kattarangko aganangenba, Cooperative Pledge-ko jinma dakaha.
Ia tom·anio, Kerupara IVCS Ltd-ni Salbison D Sangma, cooperative-ni kamrango bak ra·anichi an·tangni man·gipa namgnirangko aro maikai kamrangko ka·a, uarangni gimin jinmana agan-talate on·angaha.
Ja·mano, MCAB Ltd, Garobadha Branch-ni gita, manderangna bank-ni kamrangko agan-talate on·na dingtangmancha Financial Literacy Camp-ko ong·atangaha aro Cooperative Department-ni gitaba, Multi-Purpose Agricultural Cooperative Societies (MPACS), Multipurpose Fisheries Cooperative Societies (MFCS) aro Multipurpose Dairy Cooperative Societies (MDCS)-ko kuliani bidingo awareness session-ko ong·atangaha.
