2028 Assembly election-na kamrangko a·bachengaha: UDP
SHILLONG: United Democratic Party (UDP)-ni MLA-rang, National People’s Party (NPP)-o napangna sienga ine jangbingbanganiko NPP jegalatani ja·man, iandake jangbingbanganiko UDP-ba raken jegalataha aro da·o dipet party-ni MLA-rang pilakan nangrime dongenga ine parakataha.
UDP-ni ning·o be·srianirangko nikna man·enga aro party-ni adita sak MLA-rang, re·baenggipa 2028 bilsini Assembly election-na skang, gipin party-rango napangani cholrang donga ine jangbingbanganirangna aganchakaniko on·angengon, iandake jangbingbangenggipa kattarangni bidingo uamang an·tangtangde maming kakket ong·aniko nikja ine UDP-ni general secretary Titosstarwell Chyne parakataha.
“Da·o dipetde chingni pilak MLA-rangan party baksa nangrimen dongenga,” ine Chyne aganenba, iandake jangbingbangenggipa kattarangni gimin uamang party-ni gisepoba chanchirimaha aro banoni iandakgipa kattarang ong·kataha ukoba sandina jotton ka·aha ine parakataha.
Chyne-ni aganani gitade, party-ni gisepo chanchirimanirangko dakon, darangba party-oni ong·katna miksonganirang dongja ine ma·sina man·aha.
2028 bilsini bidingo da·o dipet iandake chanchichipsoaniara agre seng·gnangdugakuenga ine janapatengon, Assembly election-o UDP-ni candidate dake seokgipa manderangna party-ni MLA-rangba mande ra·aniko mesokna nanggen ine UDP-ni general secretary parakataha.
UDP-ni president Metbah Lyngdoh-ni dilanio, bang·bata dilgiparangan party-ko wate kattokaha ine UDP-ni dilgipa aro West Shillong-ni MLA Paul Lyngdoh-ni aganani ja·man UDP-o dilgiparang dongjaha ine agananikoba Chyne raken jegalataha.
UDP-de skangonin dilgipa saksanchi ong·ja indiba jinma ku·mong nangrimesa party-ko chalaibaaha ineba ua aganaha.
Party-ni ning·o chanchianirangde dingtanggrikna man·aia ine janapatengon, maiba kamna meligrikjaenga ong·ode uan party-rangni ning·o ong·telaigipasa ong·aia aro iakode bak ong·enga ine ma·sisretna nangja ine UDP-ni general secretary aganaha.
Nokdangko chalaiani baksa tosusaangengon, nokdangoba gisepode meligrikgijanirang ba kajia golmalrang ong·aia indiba iandake kajia golmalrangde, apsan agangrikanichi ba chanchirimanirangchisa namatna man·a ine Chyne aganaha.
2028 bilsini Assembly election-na skanggipa candidate-ko parakatanichi UDP, kamrangko ka·na a·bachengaha ineba Chyne parakataha.
