Rong·mesak bikotaniko jegalna a·dok sorkarini resolution ra·aniko namnikpaa
SHILLONG: Meghalaya a·doko rong·mesak bikotna jotton ka·anirangko nikna man·taienga ine dingtang dingtang dolrang matnangtokengon, da·o dipet ma·mong sorkari, a·doko rong·mesak bikotna tik ka·srangade ong·kujaenga ine a·dokni Bharatiya Janata Party (BJP) talataniko on·angskaaha.
BJP-ni MLA Alexander Laloo Hek-ni parakatani gitade, rong·mesak bikotna gita Union Mines Ministry, cholrangko niengkua indiba a·doko rong·mesak bikotna gitade tik ka·a ong·kujaenga.
A·doko songdongenggipa manderang nangnikjagenchimode maming dakeba ma·mong sorkari, rong·mesakrangko bikotdrana jotton ka·jawa ineba ua aganaha.
“Da·o dipet Union Mines Ministry, rong·mesak bikotani cholrangko niengmitingsa ong·kuenga aro Meghalaya a·doko rong·mesak bikotna tik ka·ade ong·kujaenga. A·doko songdongenggipa manderang ra·chakgenchimosa ma·mong sorkari, ja·kurangko de·chakataigen,” ine Hek aganaha.
A·doko rong·mesak bikotaniko jegalna gita a·dok sorkari, resolution-ko pass ka·gen ine parakatanikoba BJP MLA, namnikpaaniko mesokangaha.
A·doko rong·mesak bikotaniko skangonin a·dok sorkari jegalenga aro da·oba apsan daken jegalkuenga ine adita salrangna skangsan a·dokni Chief Minister Conrad K Sangma aganenba, rong·mesak bikotaniko jegalna Assembly-o resolution-ko pass ka·gen ine parakatahachim.
South West Khasi Hills a·jani Domiasiat jolrango mitam dilgiparang, rong·mesak bikottaina jotton ka·enga ine adita salrangna skang, Khasi Students Union (KSU) matnangatenba, a·doko rong·mesak bikotaniko champengna gita resolution-ko ra·china a·dok sorkari aro a·dokni damgittam autonomous district council (ADC)-rangko didiatachim ine nikna man·a.
Rong·mesak bikotna jotton ka·taienga ine matnanganirangna aganchakaniko on·angengon, a·bachengonin a·dok sorkari, rong·mesak bikotna on·jawa ine aganmanaha aro da·aloba ia apsankon agankuaigen ine Chief Minister parakataha.
“Meghalaya a·doko maming dakeba rong·mesak bikotna sorkari on·jawa. Iako chinga a·bachengonin aganmanaha aro da·oba ia apsankon agankuaigen. Rong·mesak bikotaniko jegalna gita sorkari, bakan resolution-ko pass ka·gen,” ine Sangma aganaha.
Ri Bhoi a·jani gitcham MLA saksa, gipin dilgiparang baksa rong·mesak donggipa a·arangko breenga aro ia a·arangko uamang ja·mano Uranium Corporation of India Limited (UCIL)-na palskana miksongenga ine adita salrangna skangsan KSU-ni dilgiparang matnangatahachim.
South West Khasi Hills a·jani Domiasiat jolrango rong·mesak bang·gipa a·arangko breanio jak donggipa gitcham MLA-rangko jinmana parakna gitaba KSU, ku·rachakaniko on·angaha.
