SHILLONG: Meghalaya a·dokoba electoral roll-rangko gital dake nipiltaina da·o Special Intensive Revision (SIR)-ko ong·atengon, SIR-ko ka·anio a·songtangni mande saksakoba watchanggaljawa ine Chief Election Commissioner (CEC) Gyanesh Kumar, ku·rachakaniko on·angaha.
Electoral roll-rango Bangladesh a·songni manderang, biming segatna man·jana gita cholrangko ra·gatani bidingo chanchirimangengon, “India a·songni mande saksakoba electoral roll-o watchanggaljawa,” ine Kumar, ku·rachakaniko on·angaha.
Meghalaya a·dokni electoral roll-rango Bangladesh a·songni manderang, biming segatna man·jana gita mai ja·kurangko de·enga, uarangni giminde talate on·na Chief Election Commissioner jechakskaaha.
Meghalaya aro Bangladesh a·songni gisepo km 443 simarang donga aro ia simarangoni bang·batakon kapengmanahaoba Bangladesh a·songni manderang, India a·songni dingtang dingtang biaprangona Meghalaya a·dok gitan re·napbaskaengachim ine nikna man·a.
Da·o dipet Meghalaya a·doko Special Intensive Revision (SIR)-ni bak gita Enumeration Form-rangko sualani 94.33 percent gapengaha aro a·doko donggipa sak 23,49,645 voter-rangoni king 22,16,512 form-rangko sualna man·aha. SIR-ko dakanio, king 9,02,046 Enumeration Form-rangko digitize ka·na man·skaaha. SIR-ko dakanio, gimik sak 3,551 Booth Level Officer (BLO)-rang, a·dokni dingtang dingtang biaprango kamrangko ka·enga.
Adita salrangna skang, New Delhi-o All India Media Conference-ko ong·atanio, Chief Election Commissioner Gyanesh Kumar aganprakengon, Special Intensive Revision (SIR)-ko ka·ani bidingo janapangenba, biapo donggijagipa, gipin biaprangona apjitanggipa, sianggipa, gipin a·songrangni aro biap damgnio pu·onenggipa manderangni bimingrangko den·gale, bilsi 18 gapgimin a·songtangni manderangko biming segatenba, electoral roll-rangko taripilna gitasa ong·atenga ine talataniko on·angaha.
Je manderangni bimingrangkon ma·sisrete den·galmanahachim, uamang a·kanganirangchi, jegalanirangchi ba mol·molachi an·tangtangni bimingrangko segatpiltaina man·gen ineba Kumar aganaha.
SIR-ko ka·anichi a·songo sak kror 60-na baten pu·ongiparangko nigopna man·aha ine janapatengon, SIR-ko dakanio bakrimaniko on·engani gimin Chief Election Commissioner, dingtangmancha a·songni manderangko mittelpilangaha.
