U·IATTIMGIPAONI
SHILLONG: Meghalaya a·doko COVID-19-ni tikarangko dingtang dingtang biaprangona re·roroe su·na a·bachengengahani gimin ia sabisini samrangko on·dapatchina gita a·dok sorkari, ma·mong sorkariko didiataha.
Sukrobar salo Health official-rangni u·iatani gitade, COVID-ni samrang Sonibar salo sokbanaba gnang ine a·dok sorkari ka·dongenga aro samrang sokbaahaon, a·doko baditana kinging COVID-ni tikarang donga uko ma·sina man·gnok.
Da·o dipet Meghalaya a·doko COVID-ni tikarang chu·onga gitan donga aro samrang komibeoba sal 15 ba sal 20-mangna chu·ongkuaigen ine Bristibar salosan a·dokni Health Minister AL Hek parakatahachim ine nikna man·a.
Da·o dipet Meghalaya a·doko lak 1.88 COVID tikarangko su·aha aro mikkang jani gisepon bilsi 45 badegimin manderangoni sak lak 6.5 manderangnaba tikarangko su·na sorkari miksongengachim.
Indake ong·engon, Meghalaya a·doko COVID man·giparangna da·o dipet ge 65 ICU-ni palangrangko man·chape gimik ge 739 palangrang donga ineba Health official-rang parakataha.
Ia ge 739 palangrangoni ge 45 ICU-ni palangrangko man·chape bang·batan East Khasi Hills a·jao ong·enga ineba official-rang parakataha.
Official-rangni u·iatani gitade, da·o dipet Meghalaya a·doko COVID man·e dongenggipa gimik sak 1200-mangoni sakgnisan ICU-o donako man·enga.
Bilongbate saenggiparangna chu·onga gitan oxygen-rangba dongama ine sing·on, Directorate of Industries-oni u·iatani gitade, a·dokna nangani kri oxygen-rangko on·na gita Byrnihat-ni Industrial Plant-o chu·onga gita oxygen-rang donga ine Health official-rang parakataha.