U·IATTIMGIPAONI
TURA: Mijal Sukrobar salo, District Legal Services Authority (DLSA)-ni gita Legal Awareness program-ko West Garo Hills a·jani Para Legal Volunteer-rangna, Panel Lawyer-rangna aro dingtang dingtang karkanarango kamko ka·enggiparangna Tura-ni District & Sessions Court conference hall-o ong·atangaha.
Ia program-ko ong·atanio Tura-ni Chief Judicial Magistrate aro DLSA-ni Secretary MK Lyngdoh, jinmana aganprakengon, karkanarango kam ka·e cha·enggiparangna Legal Service ba niamo dangdike on·na nangchongmotani gimin talataniko on·angenba, manderangna sorkarini dingtang dingtang scheme-rangchi on·enggipa bil aro namgnirangni giminba talate on·angaha. Karkanarango kam ka·e cha·enggipa manderang, an·tangtangko biming segate sorkarini on·enggipa dingtang dingtang dakchakanirangko ra·na man·na gita sorkarini on·enggipa kamrangni bidingo aganskae on·na nangengani giminba ua aganangaha.
Ia program-ko ong·atanio West Garo Hills a·jani Labour Inspector Silte BM Sangma-ba jinmana aganprakengon, karkanarango kam ka·e cha·enggiparangna on·enggipa dingtang dingtang Social Security Scheme-rang, jekai bi·sarangna poraiani scholarship, bia ka·anirango dakchakaniko on·ani, an·pakani somoio man·anirang, disability pension scheme, old age pension scheme aro uandakgipa scheme-rangni bidingo talataniko on·angenba, iandakgipa scheme-rangko Labour department-o register ka·gimin manderangna on·enga ine parakangaha. Manderangni kam changa changjani kri hajirarangko tik ka·na dongimin Minimum Wages Act 1948, Equal Remenuration Act aro Migrant Workers Act-ni giminba ia tom·anio ua jinmana talate on·angaha.
Ia program-ko ong·atanio dingtangmancha India a·songni jakgitelaoni bilsi 75 gapaniko maniani bak gita ra·gatgipa ‘Bharat Ka Amrut Mahaotsav’-koba ong·atangaha aro iano Tura-ni Panel Lawyer Debajyoti Baruah, jinmana aganprakengon, Free Legal Aid, Free Legal Services Authorities Act 1987 baksana Right to Children for Free & Compulsory Education Act 2009-ni bidingo jinmana talate on·angaha.
Photo: West Garo Hills District Legal Services Authority (DLSA)-ni gita Legal Awareness program-ko ong·atanio officer-rang, program-o bak ra·giparangna agan-talate on·enga.