SHILLONG: A·songo covid sabisi ta·raken giproroengon gipin gipin a·dokrangona kam ka·na ba poraina re·anggiparang a·dokona re·bapiltokenga, jeni a·sel Umling entry point-o bang·a manderangko salantion nikna gita man·enga.
Meghalaya sorkari, entry point-o screening ka·aniko bilakatgenchimoba damsamangmang donggipa entry point-o gipin biaprangoni a·dokona re·bapilgiparang bang·engani gimin sokbagiparang neng·nikako chagrongna gita nangenga.
Indake ong·engon Sonibar salo a·dokon sokbagiparangoni mitamrang entry point-o jikjaka aro sket-changket ong·ako chagrongna nanga ine agantokaha.
Tabrez Khan, jean Kolkata-oni Shillong-ona Sonibar salo re·bapilahachim, entry point-o RTPCR test ka·na ru·ute sengna nangako parakataha.
“Anga pring 11 bajion sokahachim, indiba atam 6 bajionan covid porikka ra·na senge dongna nangaha, unbaksana RTPCR test ka·na gong 500 tangkako gamna nangaha.
Minggipin test ka·na sengmitingo social distancing ba saksa sakgipinoni chel·tangrike dongani niamko ja·rikanian dongsrangja. Obosta nikon covid sabisi man·pagijagipaba uno chadenge sabisi man·pilgen gita nikpila.”
Uandake sakgipin Shillong saksa jean Kolkata-oni re·bapilahachim, “entry point-ona sokbaon porika ra·na ru·ute senge dongna nanga,” ine aganaha.
A·dok sorkarini tarisoani chu·ongja, namdapatna nangkuenga, jedakode manderang maming neng·nika gri porikka ra·na gita man·gen aro gamchatgipa somoiko test ka·na senge bon·atna nangjawa, ine a·dokona sokbapilgipa aganaha.
Minggipin sorkari, a·dokona sokbagiparangna register ka·na gita online application-ko on·aha, jekon a·doko napna skangan e-invite-ko bikote Umling check gate-o mesokna gita nanga, uni ja·mansa test ka·na man·a.
Sokbagiparangna sketsket ong·jana gita entry point-o sample-ko chimongna bang·bate counter-ko kulina nangenga. Uandake MLA-ba sorkariko Umling check gate-o bang·bate counter-ko rikchina mol·molaha.
