Chu·gimik lockdown-ko ra·gatkujawa: Tynsong

SHILLONG: Shillong songjinmao COVID-19 sabisiko man·giparang bang·rikrikengoba, sabisini ta·rake jelrikrikaniko champengna gita songjinmao chu·gimik lockdown-ko ra·gatatna gitade da·odipet Meghalaya Sorkario maming chanchisoa dongkuja.
May 1 tarikoni champengataniko ra·gatatgenchimoba, COVID sabisiko man·giparang bang·rikrikkuengoba chu·gimik lockdown-kode Sorkari ra·gatatkujawa ine Deputy Chief Minister Prestone Tynsong aganaha.
Songjinmao champengatani niamrangko ra·gatatomangba Shillong songjinmani ramarango manderang skangtang roanirangko nikengkua, badiaba badiaba biaprango garirangko adita chek ka·ana agrede chugipa gadangni dolonide, manderangni aro gari gorarangni skatang re·anirangko sandianide dongja gita nika.
Covid sabisi batrikrikengani gimin lockdown-ko ra·gatatgenma ine sing·anina aganchakengon, “Chinga salantini obostarangko nigrikenga, lockdown-ko ra·gatanide chong·motgipa chol ong·ja,” Pa Tynsong aganaha.
Indake ong·engon, Sorkarini on·gimin protocolrangko ja·rikchina, maskrangko ganchina, saksa sakgipinoni chel·grike dongchina gitaba Pa Tynsong a·dokni manderangko mol·molaha.