Shillong-o wal 8 bajioni pring 5 bajiona curfew-ko ra·gatanga

SHILLONG: Meghalaya a·doko aro mongsongbate Shillong songjinmao COVID-19-ko man·giparang batroroengahani gimin a·dok sorkari, Mongolbar sal dipet wal 8:00 bajioni pring 5:00 bajiona curfew-ko ra·gatangaha.
Shillong songjinmao dokkanrangkoba attam 7:00 baji dipetan chipatna gita sorkari tik ka·angaha ine u·iataha.
Iani bidingo kobor ra·timgiparangna parakatengon, sigimin manggisirangko galani giminba sorkari chanchirimangaha aro da·ode sigimin manggisirangko salni 2:00 bajionasan galna on·aignok ine a·dokni Deputy Chief Minister Prestone Tynsong parakataha.
“Sigimin manggisirangko da·o salantian 2:00 baji ba una skangan galna nanggnok aro ian COVID man·e ba COVID man·gija sianggiparangnaba ong·gen. Ia niamara Meghalaya a·dok gimiknan ong·gen,” ine Deputy Chief Minister parakataha.
Sombar salo Meghalaya a·dok gimiko sak 246 COVID man·daptaiaha aro sak 6 manderang COVID man·e siangdapaha. Meghalaya a·dok gimiko da·o COVID-19 man·e dongenggiparang gimik sak 1,884 gapengaha

Get real time updates directly on your device, subscribe now.

Comments are closed.