SHILLONG: Meghalaya a·dokona COVID-19-ni tikarang sokbadapahaon, bilsi 18 aro una batgipa manderangnaba COVID-19-ni tikarangko maming koros gri indin su·e on·gen ine Mongolbar salo, a·dokni Deputy Chief Minister Prestone Tynsong parakataha.
Deputy Chief Minister-ni parakatani gitade, Mongolbar salo a·dok sorkari, pong 42,000 tikarangna tika pongprakna gong 300/- ka·e gamataha aro da·o ia samrangko a·dokona sokbaako sengengkua.
“Samrang a·dokona sokbaahaon chinga bilsi 18 aro una batgiparangnaba tikarangko indin su·e on·anggenok,” ine Tynsong parakataha.
Meghalaya a·doko manderangni nangchongmotgipa bosturang chu·onga gita dongama dongja ukoba sorkari, Mongolbar salo niangjolaha aro a·doko manderangni nangchongmotgipa bosturang chu·onga gitan dongkuengani gimin manderang jajrengna nangjawa ineba Deputy Chief Minister parakataha.
Tynsong-ni parakatani gitade, May aro June jagnina Pradhan Mantri Garib Kalyan Anna Yojana (PMGKAY)-ni mirongrangkoba ma·mong sorkari, a·dokna on·dapataha.
“PMGKAY-ni mirongrangko salbana a·bachengengaha aro ia jani gisepon mirongrangko sualatgnok. Iana anga dingtangmancha ma·mong sorkariko mittelpilna ska,” ine Deputy Chief Minister parakataha.