GHADC-o kam ka·giparangna dormaha on·na gita cholko sandichina MDC-rang didia

TURA: Garo Hills Autonomous District Council (GHADC)-o kam ka·enggiparang, an·tangtangni dormaharangko man·tokkujaengani gimin kamrangko ka·gija jingjengattokengon, kam ka·giparangna dormaharangko on·na man·na gita dingtang dingtang cholrangko sandichina Congress MDC-rang, GHADC-ni gital Chief Executive Membor (CEM)-ko didiataha.
Iani bidingo GHADC-ni CEM Benedic R Marak-na sedoatengon, dormaharangko man·tokjae GHADC-o kam ka·enggiparangsan neng·nikanirangko chagrongenga ong·ja indiba GHADC-o kamrangko ka·gija dongtokengani a·sel dingtang dingtang bading chiwalgipa dolrang aro Garo Hills-o songdongenggipa pilak manderangan neng·nikanirangko chagrongna nangengaha ine Congress dolni MDC-rang parakataha.
“Uni gimin nanga gita ja·kurangko de·chakate GHADC-ko nambate chalaiangchina aro manderangni neng·nikanirangko namatchina chinga didienga,” ine MDC-rang parakataha.
GHADC-ni CEM-na sedoatgipa chittio soi ka·gipa MDC-rangara, Kharkutta-ni MDC Cherak W Momin, Dengnakpara-ni MDC Sadhiarani M Sangma, Batabari-ni MDC Ashahel D Shira, Amongpara-ni MDC Nehru D Sangma, Williamnagar-ni MDC Alphonsush Marak, Damas-ni MDC Pardinand D Shira, Rongrong-ni MDC Rinaldo K Sangma, Balachanda-ni MDC Agassi R Marak, Shyamnagar-ni MDC Habibuz Zaman, Betasing-ni MDC Sanjay Koch aro Samandagre-ni MDC Lahitson Sangma ong·achim.
Adita salrangna skangsan, GHADC-o kam ka·enggiparangko salgittamni gisepon kamtangtangko ka·epilchina gita Executive Committee, ge·etaniko on·angahachim ine nikna man·a.