GHADC-o kam ka·giparangko mande ra·china GSU dabia

TURA: Garo Hills Autonomous District Council (GHADC)-o kam ka·enggiparang, an·tangtangni man·gni dormaharangko on·china dabie kamrangko ka·gija jingjengattokengon, GHADC-o kam ka·giparangko ka·mikkenata gnang kamtangtangko ka·piltaichina ge·etaniko on·ahani gimin gital chief executive membor (CEM) Benedic R Marak aro gital executive committee-ko Garo Students Union (GSU) Mindikgre regional unit jegalatenba, GHADC-o kam ka·giparang indita bilsirangna dormaharangko man·jae neng·nikanirangko man·tokna nangengani giminsa an·tangtangni man·gnirangna dabitokenga ine parakataha.
GHADC-o kam ka·enggiparang salgittamni gisepo kamtangtangko ka·taipiljagenchimode rakgipa ja·kurangko de·na nangnaba gnang ine executive committee-ni ka·mikkenatgipa kattarangko jegalatengon, district council-ona dilgipa ong·e seokako man·e re·baengon, kam ka·giparangko nirok sandina, jattangna kamko ka·na aro jatna on·gimin bilko ripinge rakkina nanga ine dilgiparang ma·sina nanga ine GSU Mindikgre unit-ni president Greneth M Sangma parakataha.
“GHADC-ona seokako man·e re·baengon, GHADC-o kam ka·gipa sak 1500 manderangni nokdangrangko nirok sandianiara na·simangni daitoan ine ma·sina nanga. Uamang na·simangon pangchakenga aro nangan somoiode na·simangna dakchakanikoba on·gen. Indiba uamangni ka·donganiko man·na gitade na·simangan uamango ka·donganiko mesokchengna nanggen,” ine Sangma talatangenba, kam ka·giparangni man·na nangkuenggipa dormaharangko jagittamni gisepo on·na man·skajagenchimode GHADC-ni CEM-ba kamtangko watskana man·genma ine sing·doangaha.
GHADC-o kam ka·giparangko kamoniko ra·galbebegenchimode, kam ka·giparangba an·tangtangan dingtang dingtang janggi tangani cholrangko dake ra·skana man·na gita, kamoniko ra·galna skangan kam ka·giparangni man·na nangkuenggipa pilak grorangko on·skana nanggen ineba GSU Mindikgre unit dabiangaha.
Kamtangko a·bachengani somoion GHADC-ni gital CEM, GHADC-o kam ka·giparangko ka·mikkenatna a·bachengaha ine an·tangni suk ong·gijaniko parakatengon, “Na·a cha·a gri ringa gri ong·e nikahama? Na·a mikrongtangchi an·tangni ka·sagimin manderangni sanna banani gri ong·e siangako nikahama? Na·a salanti hajirana kamko ka·e nikahama? Na·a iarangko an·tangan cha·tote nikkujani giminsa okumu chakaniara maia aro ja 30-na batpile dormaha gri ong·e donganiara maia ukon ma·sijaenga,” ine GSU Mindikgre unit-ni president parakataha.