SHILLONG: A·doko covid sagiparang batrikrikengon city hospital-ni medical staff-rangna namen sinjetani ong·an baksana mitam hospital-rango medical oxygen-ko man·a neng·nikani a·bachengengjok.
Salantion covid sagiparang batrikrikengani gimin bang·bata city hospital-rangan covid sagiparangko sanna gita bed-ko bariata bkasana kam ka·giparangkoba bariataha aro mitam hospital-rangode biaprang gapchipaha.
NEIGRIHMS, a·dokni super-speciality hospital ong·e, gimik super speciality aro speciality OPD & ward-ni kamrangko bilakbate kam ka·achi a·dok sorkarina covid-ko warachakanio dakchakenga.
Institute, ge 145 covid bed-ko oxygen baksa reserve ka·aha, aro Covid ICU bed-koba ventilator aro life support system baksa tarienga.
Sukrobar salo NEIGRIHMS, RT-PCR test -ni result-na senge donggiparangna dingtang ward-ko tariaha. Aro mikkangchi Covid bed-ko bariatna chanchienga. Covid sagiparangko sanna gita NEIGRIHMS, tarisoenga, ine Director P. Bhattarcharya, aganaha.
“Da·odipet chingo saksni sagiparang ICU-o donga aro sak 30 saa bilonggijagipakoba sannenga. Aro mikkangchi obosta namjabatrikrika ong·ode, sagiparangko discharge ka·gen aro covid sagijagiparangko admit ka·jawa.”
“Northeast-ni dingtang dingtang bakrangonin chingo sagiparang donga aro champengatani gimin da·ode gipin district-rangoni sokbagipa dongjaenga.”
Minggipin da·odipetde medical oxygen chu·onga gita donga, indiba interstate movement-ko champengatanio ba supply ka·anio neng·nikani dongode mikkangachi bon·changnaba donga, ine Dr. Bhattacharya aganaha.
Uandake Nazareth Hospital-ni Chief Medical Officer Dr. G. Rangad, indine aganaha, “Covid sagiparangko sanna bed-ko bariatna chanchienga. Ventilator bed-de gapaha. Da·odipetde medical oxygen chu·onga gitan donga. Indiba chingni health staff-rang kamna sinjeta man·tokenga. Salantion covid sagiparang batrikrikani gimin staff-rang neng·takgija kam ka·tokenga.”
Uandake Gordon Roberts Hospital, Woodland Hospital, Bethany Hospital-rangba covid sagiparangko santokenga.
‘Covid sagiparang batrikrikenganio Medical staff-rang neng·niktokenga’
Date:
Share post:
