GHADC-na chamatgipa Kr 36.40-ko jakkalani bidingo talatchina Tura MDC dabia

TURA: Batanggimin bilsio Garo Hills Autonomous District Council (GHADC)-na ma·mong sorkari gong kror 36.40 tangkarangko chamatahachim indiba ia tangkarangko jakkelsretaha ine Tura-ni MDC Bernard N Marak matnangatenba, ia tangka paisarangko jakkalani bidingo jinmana talataniko on·china GHADC-ni gital executive committee-ko dabiangaha.
Tura-ni BJP MDC Bernard Marak-ni parakatani gitade, 15th Finance Commission-ni ning·o ma·mong sorkari, Meghalaya a·dokni damgittam autonomous district council-rangna gimik gong kror 91 tangkarangko chamatahachim indiba GHADC-na chamatgipa gong kror 36.40 tangkarangko, GHADC-ko chipe Administrative Rule ong·engmiting somoio gipin kamrangnasa jakkalskaahachim.
“Uni gimin GHADC-o kam ka·giparangni kosako ja·kuko de·na skang, GHADC-na chamatgipa gong kror 36.40 tangkarangko jakkalani bidingo jinmana talatchina anga GHADC-ni gital chief executive membor (CEM)-ko didienga. Ma·mongo NPP dolba BJP dolchi dilenggipa sorkari baksa bakrimenggipa dol ong·achim indiba GHADC-na chamatgipa tangka paisarangko niam gri dingtang kamnasa jakkalaha,” ine Marak parakataha.
Benedic R Marak, GHADC-ni gital CEM ong·engani gimin ia tangkarangko maini gimin jakkalaha uko jinmana talate on·na nanga ineba BJP-ni MDC dabiangaha.
Marak-ni parakatani gitade, GHADC-o kam ka·giparangni man·na nangkuenggipa dormaharangko EC on·na gita jechakenga indiba GHADC-na chamatgipa tangka paisarangko niam gri gipin kamrangna jakkalskaahachim.
“GHADC-o kam ka·giparangko sinjetna nangja indiba ma·mong sorkarini chame on·atgipa gong kror 36.40 tangkarangni gimin jinmana talate on·na nanga,” ine Marak dabiangaha.