SHILLONG: Re·anggipa Sonibar salo, Shillong district jail-o donako man·enggipa koidirangoni sakgni COVID-19-na porikka ra·anio positive ong·dapaha aro uandaken da·o dipet Shillong jail-o COVID man·giparang sak 3 gapengaha ine kobor on·aha.
Health Services (MI)-ni Director Dr Aman War-ni parakatani gitade, Sonibar salo Shillong district jai-o donako man·enggipa koidi sakgni COVID positive ong·aha aro iana skangba koidi saksa positive ong·ahachim.
Shillong district jail-o COVID-19-ko man·giparang batrorobaengani gimin namen jajrengna nangani ong·engaha ineba Dr War parakataha.
Indake ong·engon, Shillong jail-o ong·enggipa obostarangko sorkari name nienga ine a·dokni Deputy Chief Minister Prestone Tynsong parakatskaaha.
“Shillong district jail-o konta 24 kamko ka·enggipa doctor-rang dongjani gimin obostarangko name sandichina chinga ge·etaniko on·ataha. Shillong jail-ko nirokenggipa doctor, maiba ku·pattianirangko on·ama on·jawa ukoba chinga sengengkua,” ine Tynsong parakataha.
A·song gimikon COVID-19 ta·raken giproroengani gimin pattokrango apchaketaniko olgrokatchina Supreme Court-ba ge·etaniko on·manahachim.
Re·anggipa bilsio gitan Meghalaya a·dokoba mitam koidirangko wate pattokrango apchangketaniko olgrokatgenma ine sing·on, “Obostani kri chinga ja·kurangko de·na nanggen indiba sabisi giprorojana gita chinga kamko ka·gen,” ine Deputy Chief Minister parakataha.
Re·anggipa bilsioba Meghalaya a·doko, pattoko donako man·enggipa koidirangoni baditaba sak koidirang COVID-19-ko man·ani ja·man, pattoko koidirangni apchangketaniko olgrokatna gita mitam koidirangkode aganku·pattie ba jamino wattokahachim.
