SHILLONG: Meghalaya a·doko aro mongsongbate East Khasi Hills a·jao salantian COVID-19-ko man·giparang batrorobaengahani gimin a·dok sorkari, East Khasi Hills a·jao lockdown-ko re·baenggipa May 24 tarikona ra·dodapataha.
East Khasi Hills a·jao lockdown-ko skanggipa May 5 tarikoni May 10 tarikona ra·gatchengahachim aro uni ja·man May 17 tarikona ra·dodapatahachim. Indake ong·genchimoba, East Khasi Hills a·jao COVID-19-ko man·giparang batrorobaengani gimin sorkari, lockdown-ko ra·dodapattaina nangaha ine a·dokni Deputy Chief Minister Prestone Tynsong parakataha.
Gipin a·jarango lockdown-ko ra·gatani bidingo janapatengon, gipin a·jarango obostarangko niroke ja·kuko de·china sorkari, dingtang dingtang a·jani deputy commissioner-rangna bilko pakwate on·manaha ine Tynsong parakataha.
Da·o dipet gipin a·jarangoba antini bon·ao, chong·motan Sonibar aro Robibar salgnina chu·gimik lockdown-ko ra·gatskaengachim ine nikna man·a.
Batanggimin konta 24-ni gisepon sak 18 manderang COVID-ni a·sel siangdapaha aro ia sak 18-oni sak 16-de East Khasi Hills a·jao, saksade East Jaintia Hills-o aro saksade West Jaintia Hills a·jao ong·a ine official-rang parakataha.
Ia apsan salon sak 228 manderang, ia sabisioni nampilskana gita man·aha ineba kobor on·aha.
Batanggimin konta 24-ni gisepo gimik sak 591 manderang COVID-19-ko man·dapaha aro uandaken da·o dipet Meghalaya a·dok gimiko COVID man·e dongenggiparang gimik sak 3726 gapengaha. Ia sak 3726-oni sak 2121-de East Khasi Hills a·jao aro sak 502-de Ri Bhoi a·jao ong·enga ineba official-rang parakataha.