TURA: Garo Hills Autonomous District Council (GHADC)-o kam ka·enggiparang, bilsi gittam ong·na sipile dormaharangko man·tokkujaengani gimin batanggimin jarangonin kamrangko ka·gija jingjengattokengani a·sel GHADC-o pilak kamrangan ja·donggaatako man·na nangengahani gimin gital Executive Committee-ni on·enggipa jabongani dormahako ra·chake kamtangtangko ka·piltaichina Tura-ni MP Agatha K Sangma, GHADC-o kam ka·giparangko didiataha.
GHADC-o kam ka·enggipa manderangna jabongani dormahako gital executive committee, gitcham pay scale-o on·na ku·rachakahaoba ia jabongani dormaharangko ra·na jechaktokengani gimin GHADC-o kajinarangko chimonge tangka paisarangko man·piltaina gita jabonganiko dormahako ra·chakchina aro kamtangtangko ka·piltaichina Tura-ni MP didiataha.
Iani bidingo GHADC-ni Non-Gazetted Employees Association-na sedoatengon, GHADC-o kam ka·giparang, kamtangtangko ka·gija jingjengatengani a·sel kam ka·enggiparangsan ong·aigija Garo Hills-o songdongenggipa pilak manderangan neng·nikanirangko chagrongna nangenga ine Tura-ni MP parakatenba, executive committee-ni on·enggipa jabongani dormahako ra·chake kamtangtangko ka·piltaichina didiataha.
Iani bidingo ua GHADC-ni CEM aro a·dokni Chief Minister baksa agangrikmanaha ine janapatengon, GHADC-o kam ka·giparangni dormaharangko on·na man·na gita ua GHADC-ni executive committee aro a·dokni Cabinet baksa agangrikangkugen ine Sangma parakataha.
“Ia sal somoirango an·ching pilak biaprangon sabisini giproroanichi neng·nikanirangko chagrongna nangtokenga aro iandakmiting somoio kamrangko ka·gija jingjengataniara GHADC-ni kamrangko bon·chongdikatan baksana GHADC-o kam ka·enggipa manderangni nokdangrangnaba neng·nikanirangko ra·baani gita ong·enga,” ine Tura-ni MP parakatenba, executive committee-ni on·enggipa jabongani dormaharangko ra·chake kamtangtangko ka·piltaichina GHADC-o kam ka·giparangko mol·molataha.
