SHILLONG: Meghalaya a·doko bilsi 18-44 gadango ong·enggipa manderangna Covid-19 sabisini tika su·na www.cowin.gov.in website gita an·tangtangko biming segatani aro vaccination centre-rango May 24-oni May 30, 2021 tarikrangona tika su·na biming segatachi a·kangsoanirangko da·al Robibar 12 pm bajioni kulie on·angtaignok ine koborna parakataha.
A·dokni Chief Minister, Conrad Sangma-ba a·doko songdonggiparangko an·tangtangok biming segate tika su·na re·mikkangbatokchina didiataha.
Indake ong·engon, on·sogimin COWIN website-o online gita covid sabisini tikarangko su·na an·tangtangko biming segatanio bang·a neng·nikanirangko man·tokna nangenga ineba nikna man·ahachim.
Bilsi 18-44-ni gadango ga·akenggipa manderang bang·an sabisini tikako su·na re·mikkangbatokengachim, indiba uamangoni bang·batan system ba technical-ni gita biming segatmitingo bang·a neng·nikanirangko man·tokskaenga ineba koboro janapaha.
A·dok sorkari, bilsi 18-44 gadango ong·enggipa manderangko covid sabisini tikarangko su·tokchina didiatahaon, apsan bilsio dongenggipa manderang bang·an an·tangtangko biming segate tika su·na re·ongkatbaatokskaengako sakki on·a man·aha.
Uandake, a·bachengao CoWIN app-o sabisini tikarangko su·na gita biming segatanio bang·a neng·nikanirangko chagrongna nangani a·sel, a·dokni manderangko an·seng-baljoke rakkianian da·alo sorkarini daito ong·engani gimin biming segatanio altubatatskachina ineba NGO a·dok sorkario mol·molangahachim ineba koborna parakataha.
