TURA: Garo Hills aro Assam a·dokni simarango chu·onga gita police camp-rang dongjani a·sel Assam a·dokni manderang, West Garo Hills a·jani a·kawe jolrango nape niam gri nokrangko rikna aro bagan barirango dakna jotton ka·enga ine Garo Hills Autonomous District Council (GHADC)-ni Chief Executive Membor Benedic R Marak parakatenba, ia jolrango police battalion camp-rangko kulidapchina gita Meghalaya sorkariko didiataha.
Iani bidingo Meghalaya a·dokni Chief Minister Conrad K Sangma-na sedoatengon, chengo a·dok damgnini songgrikaniko pe·e Assam sorkari, Meghalaya a·dok ning·o aro mongsongbate Garo Hills ning·ona napdrabae nokrangko rikna aro bagan barirangko dakna jotton ka·enganichi ia jolrango so·sojengjeng ong·anirangko nikna man·rongenga ine GHADC-ni CEM parakatenba, iani bidingo ta·raken ja·kuko de·china Chief Minister-ko mol·molataha.
Marak-ni parakatani gitade, ia jolrango dambri police station-rang, chong·motan Tikrikilla, Phulbari, Rajabala aro Hallidayganj police station-rangsan dongaiani a·sel indita biap dal·ako aro mande jelgipa biaprangko nirok sandianio neng·nikanirangko chagrongna nangenga aro uandaken Assam-oni manderang Garo Hills ning·ona napdrabae ma·manti ong·gija kamrangko ka·na chol man·enga.
B Mahal jolrango bang·bata biaprangkon indin jakkalgija donengani gimin Assam-oni napdrabaenggipa manderang, ia biaprango nokrangko rikna aro bagan barirangko dakna chol man·enga ineba CEM parakataha aro ia jolrango police battalion camp-rangko kulidape on·china a·dok sorkariko didiataha.
“Meghalaya aro Assam a·dokni sima ari jolrango so·sojengjeng ong·batenggipa biaprangara, Rongsai bibra, Phulbari-ni Solartek (Naga bandh), Hallidayganj jolo donggipa Kasaripara, Singgimari bibra aro Panbari songrang ong·batenga, uni gimin ia jolrango ong·gija dakanirangko champengna man·na gita ia jolrango police battalion camp-rangko kulina nanga aro ian jolo songdongenggipa chadamberangna kamrangko ka·e cha·na cholko on·ani gitaba ong·gen,” ine chief minister-na seatgipa chittio Marak parakataha.