TURA: West Garo Hills a·jaoba COVID-19-ni batrikrikaniko warachakangkuna gita May 31 tarik dipet West Garo Hills a·jani Deputy Commissioner Ram Singh, adita niamrangko taridapataha.
Deputy Commissioner-ni u·iatani gitade, pilak nangchongmotgipa dokkanrangko Sombar, Budbar aro Sukrobar salrango pring 8:00 bajioni attam 1:00 bajiona kulianggen aro ia apsan salrangon wholesaler-rang, pring 5:00 bajioni attam 1:00 bajiona kuliangskagen.
Hardware, electrical, computer tarigipa aro uandakgipa dokkanrangko man·chape nangchongmota ong·gijagipa dokkanrangkode Mongolbar aro Bristibar salrango pring 8:00 bajioni attam 1:00 bajiona kuliangskagen ineba Deputy Commissioner u·iataha.
Tura Super Market-o bite aro me·su palgipa dokkanrang baksana Na·kam Bazar aro Kabul Bazar-o na·tok aro be·en palgipa dokkanrangkode chipe donchina gita Deputy Commissioner u·iatskaaha aro ia biaprango dokkan dakgiparangna dingtang biaprango sandie on·skachina Tura Municipal Board-ko ge·etangaha.
Ia biaprango manderang dongimin niamrang, jekai saksa sakgipinoni chel·tanggrike dongani, rongtal an·talani aro uandakgipa niamrangko manijaenga ine nikenba ia biaprango donggipa dokkanrangko district administration chipe donchina ge·etangaha.
Tura-ni a·palo donggipa pilak nangchongmotgipa dokkanrangkode Sombar saloni Sukrobar salona pring 8:00 bajioni attam 1:00 bajiona kulina on·angskaaha.
Garirangkoba odd/even nomboro pangchake re·rurana gita district administration, niamko donataha.
Deputy Commissioner-ni u·iatani gitade, Sombar, Budbar aro Sukrobar salrango 2,4,6,8 aro 0 nomborchi bon·gipa garirang re·rurana man·gen aro Mongolbar, Bristibar salrangode 1,3,5,7 aro 9 nomborchi bon·egipa garirang re·ruraskana man·gen.
Indake ong·genchimoba attam 2:00 bajionide salantian curfew a·bachengengahani gimin 2:00 bajini ja·mande gari gorarang re·rurana man·jawaha ine DC u·iataha.
Sonibar aro Robibar salrangode West Garo Hills a·ja gimikon chu·gimik lockdown ong·angkugen aro ia salrangode dokkanrangko kulina man·jawa aro gari gorarangba re·rurana man·jawa ine DC u·iataha.