TURA: NCTE-ni dongimin niamrango pangchake 2010 bilsini August 23 tarikni ja·man kamo rakkia man·gipa skigiparangko 2021 bilsini MTET-na dorgasto galjachina gita re·anggipa April-ni 27 tariko sorkarini u·iataniko All Garo Hills SSA School Teachers Association (AGHSSASTA) jegalataha.
Iani bidingo association-ni gita dingtangmancha a·dokni Chief Minister Conrad K Sangma-naba sedoataha aro iandake sorkarini u·iataniko ra·pilchina didiataha.
AGHSSASTA-ni parakatani gitade, skigiparangoni bang·batan ru·uta bilsirangoni kamko ka·enggiparang ong·e da·o sorkarini dongimin bilsini gita kamrangna galpanaba man·tokjahachim.
2010 bilsini August 23 tariko uamangko kamo rakkiani somoio, uamang elementary school teacher-o kamko man·piltaina gita eligibility test-ko sena nanggen ine ua somoio maming NCTE-ni dongimin niamrang dongjachim ineba AGHSSASTA parakataha.
Skigiparangni parakatani gitade, uamang DERT-oniko sing·sandie ra·on, MTET-ara a·doko skigipani kamna entrance porikka gitasan ong·aia aro ian gital candidate-rangnasan ong·aia ine uamang ma·sina man·ahachim.
“Uni gimin chingni ma·siani gitade, ia MTET-ara gital candidate-rangna miksonge on·gipa porikkasan ong·aia aro uamangsa skigipani kamna ia porikkako sena nanga. 2010 bilsini NCTE-ni dongimin niamrango kam ka·soenggipa skigiparangnade ia MTET-ko sena nanga ine maming janapani dongjachim,” ine AGHSSASTA parakatenba, skigiparangko ia MTET-oniko watchina sorkariko didiataha.