SHILLONG: Meghalaya Energy Corporation Limited (MeECL)-ni mitam distribution circle-rangko REC-PDCL-na pakwate on·ani bidingo sorkari, Budbar salo bon·kame chanchirimanggen aro nangani kro ja·kuko de·anggen ine Mongolbar salo a·dokni Chief Minister Conrad K Sangma parakataha.
Mongolbar salo a·dokni Power Minister James K Sangma, a·dokni Chief Minister-ko grongenba, REC-ni bi·ani gita distribution circle-rangko pakwate on·gija, gong kror 1345 ong·gipa Atma Nirbhar-ni loan-ko chotpilna gita chu·gimik tangka paisarangko dakchake on·skachina didiangahachim.
Indake ong·genchimoba, REC-PDCL-ni bi·ani gita MeECL-ni mitam distribution circle-rangko REC-na pakwate on·jagenchimode a·dok sorkari, Atma Nirbhar-ni gong kror 1345 loan-na da·o bilsi 10-ni gisepo gong kror 580-ko gamdapna nangskagen ine a·dokni Chief Minister talatangenba, iani bidingo sorkari Budbar salo Cabinet tom·anio chanchirimenba ja·kuko de·anggen ine parakataha.
Chief Minister-ni parakatani gitade, Atma Nirbhar-ni gong kror 1345 loan-na tangka paisarangko a·dok sorkarimangmangchi chotpilaigija mitam bakrangkode MeECL-naba pakwatna gita Finance department tik ka·angahachim indiba tangka paisarangni pal MeECL-ni mitam distribution circle-rangko REC-PDCL chalaiskana sorkario bi·ahachim.
Indake ong·engon, MeECL-ni mitam distribution circle-rangko REC-PDCL-na pakwate on·aniko Power department raken jegalenga aro Atma Nirbhar-ni gong kror 1345 loan-ko chotpilna gita chu·gimik tangka paisarangko dakchakchina sorkario bi·aha ine a·dokni Power Minister James K Sangma-ba parakatskaaha.
Iani bidingo chanchirimna gita Budbar salo Cabinet-ni tom·aniko ong·atengani gimin Power department, iani bidingo Cabinet baksa agangrikanggen, maina MeECL-ni mitam distribution circle-rangko REC-PDCL-na on·genchimode mikkangchi MeECL, kajinarangko man·jawaha ineba Sangma parakataha.