MeECL-oni neng·takgimin manderangni man·gnirangko on·china NTDF didia

 

TURA: MePDCL-o kam ka·e neng·takgimin manderang, 2021 bilsini April jaoni da·alona kingkingan pension-rangko man·tokkujaengani a·sel neng·nikanirangko chagrongna nangtokengaha ine New Tura Development Forum (NTDF) suk ong·gijaniko parakatenba, kamoni neng·takgimin manderangna ta·raken uamangni man·gnirangko chu·gimik on·china MeECL-ni official-rangko didiataha.

NTDF-ni general secretary L Ch Momin-ni parakatani gitade, ia sal somoirango a·gilsak gimikon COVID-19 giproroengani a·sel manderang neng·nikanirangko chagrongna nangtokenga aro iandakmiting somoio kamoni neng·takgimin manderangna, uamangni man·gnirangko indita jarangna on·chipgija donaniara namen ra·chakna man·gijani aro kragijani ong·engachim.

“Chingni kobor man·soani gitade, MeECL-o kam ka·e neng·takgimin manderang, April jaonin an·tangtangni pension-rangko man·tokkujaenga aro da·o gita a·gilsak gimikon COVID-19 giproroengmiting somoio iandake uamangni man·gnirangko on·gija donchipaniara uamangni janggi tanganio neng·nikaniko on·dapani gitasa ong·enga,” ine Momin parakatenba, kamoni neng·takgimin manderangna jaani on·enggipa pension-ko somoi gita on·taipilchina MeECL-ni official-rangko mol·molataha.

Indake ong·engon, MeECL-ni mitam distribution circle-rangko chalaina gita Rural Electrification Corporation Power Distribution Company Limited (REC-PDCL)-na on·skana sorkarini manchianikoba NTDF raken jegalataha aro ia distribution circle-rangko gipin a·dokni company-rangna on·genchimode MeECL-o kam ka·soenggipa manderangna aro mikkangchi a·dok gimiknan jajrengna nangani ong·gen ine parakataha.

“Uni gimin MeECL-ni distribution circle-rangko gipin a·dokni company-rangna pakwate on·na skang, a·doko songdongenggipa manderangni namgnina chanchie ja·kuko de·china chinga a·dokni Power Minister James K Sangma aro gipin official-rangko didienga,” ine NTDF-ni general secretary Momin parakataha.

Get real time updates directly on your device, subscribe now.

Comments are closed.