TURA: Garo Hills Autonomous District Council (GHADC)-o NPP-chi dilenggipa executive committee-ni gital membor-rang kamtangtangko jako ra·angtokaha aro ia gital executive committee-o NPP-ni saksni, BJP-ni saksa, GNC-ni saksa aro Independent MDC sakgni biapko man·aha.
GHADC-ni planning, personnel, general administration, customs & usages aro gipin portfolio-rangko GHADC-ni chief executive membor (CEM) Benedic R Marak, an·tang ra·rikaha aro land & revenue, relief & rehabilitation baksana gipin portfolio-rangko deputy CEM Nikman Ch Marak-na on·skaaha.
Haat, brick aro sand market-ko executive membor Dormonath Ch Sangma-na on·aha aro tourism, reformation baksana coordination portfolio-rangko executive membor Henen R Sangma-na on·skaaha.
Civil works aro administration of justice portfolio-ko Independent MDC Nathawal S Marak man·aha aro forest & environment, water conservation & catchment area development baksana jhum control portfolio-ko sakgipin Independent MDC Arbinstone B Marak man·rikskaaha.
Transport, printing & stationary-ko NPP-ni Crozier G Momin-na on·aha aro agriculture, sports & youth affairs baksana sand market portfolio-ko Dalu-ni BJP MDC Promod Koch-na on·skaaha.
Taxation aro Water resources portfolio-ko Chief Minister Conrad K Sangma-ni boninggipa Grahambell A Sangma-na on·aha aro rural development, arts & culture aro resource mobilisation portfolio-rangko Chief minister-ni sakgipin boningtang Anseng A Sangma-na on·skaaha.
NPP-ni sakgipin MDC Sengbath R Marak-naba gital executive committee-o rural administration, ferry ghats aro fisheries portfolio-rangko tikataha.