SHILLONG: Meghalaya a·dokoba COVID-19 giproroengkuani a·sel New Shillong Township-o rikenggipa gital Assembly nokko somoi gita matchotkujanaba gnang.
Official-rangni u·iatani gitade, maming champenganirang dongdapjahagenchimode ia gital Assembly nokko mikkang bilsini Autumn session-na skang matchotskanaba gnang.
Ia gital Assembly nokko rikna gita chamgimin gong kror 127-oniko da·o dipet gong kror 88 tangkarangko koros ka·manahachim aro ia Assembly nokko rikani da·o dipet 76 percent-ni gitade kamrang matchotahachim.
Ia Assembly nokko rikanio kamrangko ka·na gipin a·dokrangoni labour-rangko rimbana gita Meghalaya Assembly-ni Speaker Metbah Lyngdoh, Home (Police) department-ni Commissioner & Secretary CVD Diengdoh-na seatenba, permission-ko bi·ataha ineba official-rang parakataha.
Koborko on·ani gitade, ia Assembly nokko matchotatna gita gipin a·dokrangoni labour-rangko rimbae kamrangko ka·atna nangengachim.
“Mikkang antiode kam ka·giparangko rimbana man·gen ine chinga ka·dongenga aro uamangko Health department-ni dongimin niamrango pangchake dingtang quarantine ka·e donna gita chinga New Shillong Township-ni hotel-rangko tarie donsoenga,” ine official-rang parakataha.