TURA: Williamnagar-oni Shillong-ona taxi parako nangana bate rakdugae ra·enga ine songsalna kamko ka·enggipa Nilbath Ch Marak, East Garo Hills a·jani Deputy Commissioner-na badi ka·doangaha.
Deputy Commissioner-na badi ka·doanio Marak-ni parakatani gitade, Williamnagar-oni Shillong-ona taxi parako sakprakon gong 2000/- ka·e ra·enga aro iani a·selan Shillong-chi re·na nangenggipa manderang neng·nikanirangko chagrongna nangtokengachim.
“Uamangni para ra·aniko uamang manderangna on·enggipa tikitrangoba see on·ja aro uandaken manderang Shillong-chi re·a doanio neng·nikanirangko man·na nangtokenga,” ine Marak parakataha.
Skango ra·gipa parako hisapede ian namen rakdugaenga aro rang·gitik da·o parako bate ra·aniara kraani ong·jaenga ineba Marak, iani bidingo nanga gita ja·kurangko de·china East Garo Hills a·jani DC-ko didiataha.