Dalu-ko Civil Sub-division songchina JMC dabia

SHILLONG: Mairang-ko gital district songna parakatanina Dalu Civil Sub-division Joint Movement Committe (JMC), Mairang-na kusi ong·chakaniko parakatan baksa, Dalu-koba gital Civil Sub-division songchina gita JMC, MDA Sorkario dabiaha.
Dalu, Meghalayani gitchambatsranggipa a·jolrangoni damsa ong·a, jeon Dalu Police Station-ko songani sal tarikrangan donga, JMC aganaha.
Unigimin Dalu-ko Civil Sub-division songchina dabianiara man·na kragipan ong·a aro Dalu-ko ta·raken Dalu Civil Sub-division songchina gita chinga MDA sorkario dabia ine JMC chairman Junstemey R Marak aganaha.
Ua agankua je Dalu Civil Sub-division-ko songchina gita uamang baditaba changna  Meghalaya Chief Minister Conrad K. Sangma gisik ra·attaitaiaha, maina uamangni headquarter-an Turaosa ong·ani gimin Dalu-ni manderang bang·a neng·nikanirangko man·enga ineba Marak aganaha.
Indake ong·engon Daluni manderangni namgnina aro a·jolko namroro silroroaniko ra·bana gita Daluko Civil Sub-division songchina JMC, sorkario mol·molataha.