SHILLONG: Gnigipa changna sokbagipa COVID-19 sabisichi a·dok bilongbee sin·jetako man·ahani gimin, gittamgipa changna COVID sabisi a·dokona sokbataina nangode ingipao jajrengsoenba Health department nambate tarisoengaha ine Health Department-ni Principal Secretary, Sampath Kumar aganaha.
“Gittamgipa gadangnade chinga nambate tarisoaha, jeon chinga COVID test ka·anirangko komiatjawa aro containment measure-rangkoba dakangaigen, kam ka·anirang chu·ongaignok ine donani dongjawa,’’ Sampath Kumar aganaha.
Gipin a·dokrango gita Meghalayao COVID-oni ong·katgipa rokomsa Delta plus sabisi dongama dongja, test ka·na gita department, sample-rangko watatenga, ua aganaha.
“Gittamgipa changna COVID sokbana skangan, ventilator-rangko maidake jakkalna nanga, aro paediatric ICU-rangko chalaina gita continuous positive airway pressures (CPAPs) jakkalani gimin medical team-rangna skie on·samsoengaha aroba sana banani oxygen plant-rango songdimani aro ICU unit-rangko tarisooani kamrangkoba ka·soengaha ineba Kumar aganaha.
“A·dokni pilak damgittam region-rangon chinga damsni Paediatric Intensive Care Unit (PICU)-rangko tariengaha” jeon da·omitingo NEIGRIHMS aro Children’s Hospital-osan paediatric ICU-rang dongengkua.
COVID man·gipa bi·sa aro an·o donggipa me·chikrangko sana banani aro nirokani bidingo nangchongmotgipa cholrangko ra·gataha aro IvIG dakgipa nangchongmotgipa samrangba dongaha, Kumar aganaha.
Bilsi 18 batgipa lak 20 manderangko tikka su·na nisan ka·emitingo Sombar salona lak 7.5 kode su·manaha. “Chinga salantian 13,000 mangkode tikka su·jringenga. Manderang da·ode tikka su·na ong·katbatokengaha. India social media ong·gija kattarangko jangatgiparangni a·sel tikka su·na kengiparangba bang·engkua,” Sampath Kumar aganaha.
