SHILLONG: Assam-o Cattle Preservation Bill 2021-ko pass ka·ani a·sel a·dokona matchurangko ra·baanio neng·nikanirang donggenchimode ma·mong sorkarini dakchakaniko bi·atgen ine a·dokni Chief Minister Conrad K Sangma parakataha.
“Assam-o ia niamko ra·gatanichi gipin a·dokrangoniko matchurangko ra·baanio an·chingni a·doko neng·nikanirangko man·na nanggenchimode chinga Assam sorkari baksasan ong·aigija ma·mong sorkari baksaba agangrike dakchakaniko on·china didiatgen,” ine Sukrobar salo Chief Minister parakataha.
Meghalaya a·dokna matchurangko watatenggipa dingtang dingtang a·dokrang, jekai West Bengal, Andhra Pradesh, UP, Telangana aro uandakgipa a·dokrang baksa Meghalaya sorkari agangrikmanaha aro Assam-o ia niamko ra·gatanichi matchurangko ra·baanio maming neng·nikanirang dongjawa ineba Chief Minister parakataha.
Ia niamko Assam sorkari maikai ra·gatna sienga, uko ma·sie ra·na gita Meghalaya sorkari skanggipa ia Bill-ko name nie ra·chengna nanggen ineba Sangma aganaha.
Assam Cattle Preservation Bill 2021-ko Bristibar salo Assam Cabinet ra·chakangahachim aro ia Bill-ko da·o ong·na sienggipa session-o Assam Assembly-ona ra·angna siengachim.
Assam a·dok gita matchu salruraaniko aro mongsongbate Bangladesh a·songona niam gri matchu badinganiko champengna gita ia gital niamko Assam sorkari ra·gatenga ine Assam a·dokni Chief Minister Himanta Biswa Sarma parakatahachim.
Je biaprangon Hindu-rang songdonga aro je biaprangon matchurangko olakkia, uandakgipa biaprangode matchurangko cha·na nangja ineba Assam-ni Chief Minister aganahachim.
Karnataka, Madhya Pradesh aro Uttar Pradesh a·dokrangoba iandaken matchurangko naljoke rakkina gita dongimin niamrang donga ine nikna man·a.