SHILLONG: Budbar pringwalo, East Jaintia Hills a·jani Khliehriat-o donggipa police reserve-o IED boma gopretaniko Hynniewtrep National Liberation Council (HNLC) bobil dol a·kangataha.
Ia biapo boma gopretaniko a·kangatengon, HNLC dolni manderangko police-rang ka·saninggija dake kal·ake roenba so·ote galahani gimin a·jak sokskana gita IED bomako gopretaha ine Budbar salo HNLC dol parakataha.
East Jaintia Hills a·jani Brishyrnot-o kamrangko ka·engani gimin HNLC bobil dol, Star Cement company-naba mikrakataniko on·angaha.
“Meghalaya a·doko songdongenggipa Tribal jatrangni neng·nikanirangko niatna gisiko nangjagenchimode HNLC dol, mikkangchiba so·sojengjeng ong·atani kamrangko ka·angkugen ine ian Union Home Minister Amit Shah-naba mikrakatani ong·china,” ine HNLC-ni publicity secretary Sainkupar Nongtraw parakataha.
Indake ong·engon, Khliehriat-o boma gopretgipani bidingo sorkari, am·sandianirangko dakna a·bachengataha ine a·dokni Home Minister Lahkmen Rymbui parakatskaaha.
“Khliehriat-ni police quarter-o ma·sina man·gijagipa manderang bomako gopretaha aro boma gopretgipa biapo adita nosto ong·anirangko nikna man·aha. Chinga iani bidingo ning·tue sandina a·bachengataha,” ine Home Minister parakataha.
Budbar pringwalni 1:30 bajimango East Jaintia Hills a·jani Khliehriat-o donggipa police reserve-o IED boma gopretahachim aro ia boma gopretanio police reserve-ni boundary wall nosto ka·ako man·ahachim. Indake ong·genchimoba ia boma gopretanio darangba saknaanirangkode man·skajahachim.