TURA: Re·anggipa June jao, Haryana a·dokni Gurugram-o A·chik chadambe sakgnini ong·na kragija a·selo sianganiko jegalna gita Bristibar salo South West Khasi Hills a·jani All Khasi Hills A·chik Federation (AKHAF) aro Garo Students Union (GSU) dolrang nangrimenba, jinma tom·bimonge re·jomaniko Moheskola jolo ong·atangaha.
Haryana a·dokni Gurugram hospital-o Rosy Sangma-ni siangani ja·man, uni sianina hospital-o kam ka·enggipa doctor aro nurse-rangko uni bak nanggipa Samuel Sangma matnangahachim indiba salgipino uni sigimin manggisikoba uni dongchakenggipa hotel-ni kuturionikosa man·ahachim.
Ia a·sel ong·ani ja·mano Meghalaya a·doko aro salgro salaramni dingtang dingtang biaprangoba dingtang dingtang dolrang, ia a·sel ong·aniko jegale, ia a·selni bidingo inquiry-ko dakchina aro dos donggipa manderangni kosako rakgipa sastirangko on·china dabitokengachim.
Indake ong·engon, Bristibar salo AKHAF aro GSU dolrangba, Moheskola jolo jinma re·jomaniko ong·ate ia a·selko raken jegalangtokaha aro ia a·selko name sandirokenba, dos donggipa manderangna rakbatgipa sastirangko on·china dabiangtokaha.
Ia a·selni bidingo inquiry-ko dakna ma·mong sorkari CBI-na pakwatatgnok ine adita salrangna skangsan parakatahachim ine nikna man·a.
