SHILLONG: Sorkari baksa agangrikna gita ku·baltitimgipako seokkujaskal Hynniewtrep National Liberation Council (HNLC) bobil dol, a·doko so·sojengjeng ong·ataniko dontongjawa ine Robibar salo mikrakataniko on·angaha.
HNLC bobil dol baksa tom·tomanina agangrikani gimin janapatengon, iani bidingo Meghalaya sorkari ma·mong baksa agangrikenga indiba HNLC bobil dol, so·sojengjeng ong·atani kamrangko watgalchenggenchimosa agangrikanirangkode dakna man·gen ine adita salrangna skang a·dokni Chief Minister Conrad K Sangma aganahachim.
Adita salrangna skang East Jaintia Hills a·jani Khliehriat-o donggipa police reserve-ko boma gopretani gimin so·sojengjeng ong·atani kamrangko dontongchina gitaba Chief Minister, HNLC bobil dolko didiatahachim.
Indake ong·engon, sorkari baksa agangrikna gita ku·baltitimgipako songe on·kujaskal aro HNLC bobil dolko agangrikna cholko on·bebegen ine sorkari sakkiko on·chengna man·genchimosa so·sojengjeng ong·atanirangko dontonggen ine HNLC-ni publicity secretary Sainkupar Nongtraw parakatskaaha.
Nongtraw-ni parakatani gitade, ru·uta bilsirangonin sorkari, HNLC bobil dolko agangrikna okamgen ine aganenba da·onan iako chu·sokatchipkujaengachim.
“Uni gimin sorkari, a·doko tom·tomaniko nangnikbebeenga ong·ode aro chingko tom·tomaniona re·baatna nangnikchongmotenga ong·ode skanggipa ku·baltitimgipako seokchina chinga nangnikenga. Chinga ia dabianiko chu·sokate on·jaskal chinga so·sojengjeng ong·atani kamrangko ka·angkuaigen,” ine HNLC-ni general secretary mikrakataniko on·angaha.