TURA: South West Garo Hills a·jani Grenggandi songoniko niam gri bol salangenggipa gari bolsako Federation of Khasi Jaintia & Garo People (FKJGP) Garo Hills Zone-ni membor-rang rim·rikna man·aha.
FKJGP Garo Hills Zone-ni general secretary Raksrang A Sangma-ni u·iatani gitade, re·anggipa Sonibar salo Assam-oni bol badingsrukgipa manderang, Grenggandi songoniko Mahindra pik up gario bol gatengmitingko songni manderang nikenba, FKJGP-ni membor-rangna u·iataha aro bakan FKJGP-ni membor-rang ua biapona re·angenba, bol gate salangenggipa gariko rim·rikna man·aha.
“Koborko man·soani ja·man chingni membor-rang ua songona re·angon, bol gate salangenggipa gariko dolong sambao nikeaha aro ia gariko neng·takate, garioniko am·sandion gario bolrangko man·aha. Ia bolrangko salna gita ia manderango maming nangchongmotgipa lekkarang dongjachim aro ia gariba registration nombor dongjachim,” ine Sangma talatangenba, ja·mano ia gariko bolrang baksa Tura-ni State Divisional Forest office-na pakwate on·ataha ine parakataha.
Garo Hills-ni bol wa·arangko salantian gipin biaprangona niam gri salangrongengani gimin mikkangchi iandake niam gri bol badinganiko champengna gita rakbate nirok sandianirangko dakchina gitaba FKJGP, GHADC aro state forest department-ko didiataha.
“Garo Hills-ni a·kawe jolrango niam gri bol ratani karkanarangko chalaiengani a·selsa Garo Hills-ni bolrangko pale cha·aniba batroroenga. Uni gimin niam gri chalaienggipa saw mill-rangko chipatchina chinga didienga,” ine FKJGP-GHZ-ni general secretary parakataha.
