Chief Minister, WGH-ni dingtang dingtang project-rangko nirokea

TURA: Megahalaya Chief Minster Conrad K. Sangma mijal Butbar salni bako Tura aro uni wilwilao jako ra·enggipa aro chalaienggipa dingtang dingtang project-rangko nirokeaha.
Pa Sangma Rongram Block-ni ning·ogipa Prime Hub-ni kamrangkoba nirokeaha. Chief Minister, Rongram Block-ni ning·ogipa Jongdikre-onaba re·angeming PRIME Hub-ni kamrangko nieaha aro Producer Group-rang aroba Chidilsa Piggery Co-operative Society-ni memborrangko grongenba uamangni nangnikani aro neng·nikanirangni bidingo agangrikaha. Iana agreba Pa Sangma, Rongram C&RD Block-ni Rongwalkamgreo donggipa Anganwadi Centre-onaba re·angaha aroba Jakkindil Village Organisation-ni gita chalaienggipa project-rangkoba re·ange nirokeaha.
Chief Minister, Turao rikenggipa PA Sangma Integrated Sports Complex-ko rikani baditana chu·sokangengahachim, uakoba nieaha, jekon ia bilsi December jaode matchotatna gita ka·dongsoenga. Ia stadium-o kal·chakramrang donggen, jeon sak hajal 10 manderang asonge nina gita man·gen Ian kror 125-ni project ong·a, jenan mitamko Ma·mong Sorkarini Ministry of Minority Affairs dakchakataha.
Dolchet Self Help Group-rangni nangrimgimin dol Jakkindil Organisation Committee-ni chalaigipa Hatchery Unit-koba Chief Mnister, Rongkhon, North Tura-ni Dachimagre songo oprake on·angaha. Ia Hatchery Unit, SHG-ni memberangna janggi tangani cholrangko on·an baksana, gipin me·chikrangnaba ian dakmesokani ong·aha ine Chief Minister aganaha.
West Garo Hills-ni Babadam sepangogipa Chidekgreo rikenggipa Tribal Research Institute-koba nirokna gita Meghalaya Chief Minister Conrad K Sangma mijalo re·angaha. Ua agana, ia Tribal Research Institute-ara uni pagipa PA Sangma sagini nikjumangsogipa ong·achim aro ia Tribal Research Institute-o salgro salaramo songdonggipa pilak jat aro uamangni dakbewalrangni bidingo skie ra·aniko dakram biap ong·gen, jeon North East Tribal Festival-koba sokachakgen ine Pa Sangma aganaha.
Project-rangko re·roroe nirokeanio, North Tura MLA, Thomas A Sangma, West Garo Hills Deputy Commissioner, Ram Singh aro Rongram BDO, Shelley Ch Momin mangba Chief Minister baksa ja·rikpaaha.
Chief Minister, Bakdilni chalaigipa Babadam PHC-ona re·ange nirokeaniko dakaha.
Unaskang, Chief Minister uni Rangwalkamgre ICDS centre-ona re·angmitingo VEC memborrang, Nokmarang, aro gipinrang baksa agangrikaniko dakaha.

Get real time updates directly on your device, subscribe now.

Comments are closed.