SHILLONG: South Garo Hills-ni Nangalbibra songo bilsi 14 ong·gipa me·chik bi·sako drae til·ekani gimin bang·arangoni jegalat-tokaha aro maina a·selo ga·akgipako Williamnagar Civil Hospital-oni South Garo Hills district headquarter-chi watataha, ineba singanirangko dakattokaha aro iani bidingo sepangni jolni district-o sandirikitaniko dakchinaba singataha.
Social Welfare department ia chu·gimik a·sel ong·aniko kobor on·china singataha, Assembly Committee on Women Empowerment committee-ni gita tom·anikoba dakangaha aro iani bidingo jako ra·gipa official-rangkoba committee-ni mikkango ia a·sel ong·ani gimin u·aitchina aganaha.
Ia a·sel ong·aniko jegale, Social Welfare Minister Kyrmen Shylla agana, ” ia a·sel ong·aniko knasoe namen dukko man·aha”. Ia a·sel ong·ani ja·man bi·sarang noktangoni a·palchi ong·katna kengnok, maina ia a·sel ong·anioba dambegipa me·chik bi·sa candle ba mombatiko brena a·palchi ong·katangahachim, unon indakgipa ka·namgijagipa aro namgijagipa a·sel ong·aha,” ine ua aganaha.
Dos dakgipa mandeko rim·a man·a man·genchimoba, ua agandapa, indakgipa a·sel ong·ani jako donggipako niamni gita raken sasti on·aniko dakna nanga, jekode mikkangchiba indakgipa ka·namgijagipa a·sel ong·aniko champengna man·gen.
Ua chadambe me·chiko Williamnagar Civil Hospital-oni South Garo Hills district headquarter-chi watatani bidingoba Social Welfare Minister agana, janggiko jokatna maming niamko ja·rikani dongna nangja, ua an·tangde janggiko jokatna niamko pe·e kamko dakakoba ong·e nikaia, ine aganaha.
“Anga mande jat ong·e mande skana ka·saniko dakna nanga aro jemangan indakgipa neng·nikaniko chagronge dongengachim, uamangna dakchakaniko on·na nanga,” ine agandapaha.
Apsan somoio, Assembly Committee on Women Empowerment (ACWE) -ni chairperson Ampareen Lyngdoh agana, maina a·selo ga·akgipa dakchakaniko bi·na km 75 songrengna nangaha iani giminan anga ma·sina man·jaha. Indake dakanian ia mamlao jajrenganiko ra·baha, aro mikkangchiba indakgipa a·sel ong·anan jajrengchakani ong·aha.”
“Mainasa uko Williamnagar hospital-o sana bananiko ba medical-ni gita dakchakaniko on·na jechakaha, maina uamang Baghmara-ni PHC-chi watataha , indakgiparangkon chinga sandina jotton ka·enga aro maina a·selo ga·akgipako medical-ni gita dakchakaniko on·jaha, ia gimik obosta ong·ani report-rangko chingna nangenga? ine ua an·tangni agananio singdoataha.
Maiabade iano gimae dongenga, ine ua agana, “Chinga iani bidingo kam ka·enga aro department-oniko iani dingo sandianiko dakchina singataha.”
“Sabisi batroromiting somoio indakgipa a·selrang a·doko changni chang ong·aniko knasoe namen gisiko dukko man·aha. Anga online-ni gita committe tom·aniko dakgen aro committee-ni mikkango iani gimin chanchianiko dakgen,” ine ua aganaha.
Ia ja·gokatani kobor man·soanio, chadambe me·chikko sak 4 manderang jinma melie til·ekdraha, jean South Garo Hills-ni Nangalbibara songo walni somoio an·tangni ma·gipana dokanchiko mombati ra·na re·angahachim.
Ia a·selo ga·akgipana namgija obostade bilsi 14 ong·gipani saknae dongmitingo Williamnagar Civil Hospital jean a·sel ong·gipa biaponi sepangbatgipa biap ong·achim uko Baghmara hospital-chi sana bananiko dakna watataha, jean a·sel ong·gipa biaponi km 75-ni gita chelgipa rama ong·a. Police dos dakgipa sak 4 manderangko rim·aha.
Get real time updates directly on your device, subscribe now.
Next Post
Comments are closed.