TURA: Tura-ni Rongkhon Songgital-o jabol galchakenggipa biapo skatang jabolrangko galengkuani a·sel Rongkhon Songgital gopramonasa ma·manti jabolrang jokonange neng·nikaniko on·enga ine Zikku Balgra N Marak-chi dilenggipa Garo Students Union (GSU), Tura Municipal Board (TMB)-ni kosako matnangatenba, a·dokni Chief Minister Conrad K Sangma-na sedoataha.
Iani bidingo Chief Minister-na seachi parakatengon, Rongkhon Songgital-ni jabol galchakram biapo TMB-ni manderang, skatang jabolrangko galengani a·sel jabolrang ka·mao donggipa gopramrangonasa jokangskaenga aro ian namen nitogijaniko aro kragijaniko ong·atenga ine GSU-ni president parakataha.
Ia biapo pilak dakgipa jabolrangkon galengani gimin moilarang ka·mao donggipa Ringre chiringona jokange, ia chiringko jakkalenggipa manderangnaba namgijaniko ra·baenga ineba GSU, a·dokni Chief Minister-na badi ka·doangaha.
GSU-ni parakatani gitade, ia jabol galchakgipa biapko ka·machipakni chukale pakma tarigenchimode jabolrangko bewalde ra·chakna man·genchim indiba ia biapo iandake pakmarangko tariani dongjani a·selan jabolrang ka·machinasa jokangskaengachim.
“Uni gimin pilakni namgninan ia biapo jabol galaniko nambate nirokatchina chinga didienga,” ine GSU-ni president parakataha.
Adita salrangna skangsan, iani bidingo Rongkhon Songgital Graveyard Committee-ni gitaba Tura Municipal Board (TMB)-na sedoate, ta·raken ja·kuko de·china mol·molatahachim ine nikna man·a.
Rongkhon Songgital-o jabolrangko skatang galenga ine GSU, CM-na sedoata
Date:
Share post:
