SHILLONG: Sukrobar saloni Sonibar salona konta 24-ni gisepo Meghalaya a·dok gimiko sak 693 manderang COVID-19-ko man·daptaiaha indiba ia apsan somoion sak 519 manderangde a·dokni dingtang dingtang biaprango nampilskana man·aha.
Sonibar salo COVID-19 man·dapgipa sak 693 manderangko channe da·o Meghalaya a·dok gimiko COVID-19 man·e dongenggiparang gimik sak 4708 gapengaha aro ia apsan salon mande sak 5 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1014 gapskaengaha.
Sonibar salo positive ong·gipa sak 693 manderangoni sak 12-de East Garo Hills-o, sak 26-de East Jaintia Hills-o, sak 293-de East Khasi Hills-o, sak 5-de North Garo Hills-o, sak 80-de Ri Bhoi a·jao, sak 8-de South Garo Hills-o, sak 5-de South West Garo Hills-o, sak 27-de South West Khasi Hills-o, sak 79-de West Garo Hills-o, sak 69-de West Khasi Hills-o aro sak 89-de West Jaintia Hills a·jao ong·a.
Konta 24-ni gisepo COVID man·e sianggipa sak 5 manderangara East Khasi Hills a·jaoni ong·a.
Ia apsan salon gimik sak 519 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 54,875 gapskaengaha.
